Eýropadaǵy qaýipsizdik pen yntymaqtastyq uıymynyń (EQYU) Demokratııalyq ınstıtýttar men adam quqyqtary bıýrosynyń mıssııasy 8 mamyrda Qazaqstandaǵy kezekten tys prezıdent saılaýynyń ótýin baqylaýdy bastady. Bul týraly búgin Nur-Sultanda ótken baspasóz jıynynda mıssııa jetekshisi Ýrshýla Gaek habarlady. Bul - Gaektiń saılaýǵa alǵash qatysýy. Odan bólek mıssııa quramynda 11 sarapshy men EQYU-ǵa múshe elderden 24 uzaqmerzimdi, 300 qysqamerzimdi baqylaýshy bar.
Gaektiń sózinshe, mıssııa Qazaqstan bıliginiń ótinishi boıynsha kelgen. Bıýro ókilderi saılaý aıaqtalǵansha elde bolady.
Bıýro mıssııasy Qazaqstanǵa alǵash ret kelip turǵan joq. Túrli jyldary uıym músheleri eldegi prezıdent jáne parlament saılaýlaryna baqylaý júrgizgen. 2015 jyly ótken prezıdent saılaýynan keıin jarııalanǵan qorytyndy qujatta uıym saılaý naýqany men daýys berý kezinde zańbuzýshylyqtar bolǵanyn jazǵan.
Qazaqstanda prezıdent saılaýy bıyl 9 maýsymda ótedi. Saılaýǵa jeti kandıdat qatysady.
Qazaqstanda prezıdent saılaýlary 1991, 1999, 2005, 2011 jáne 2015 jyly ótken. Olardyń úsheýi kezekten tys boldy. Barlyǵynda eldiń burynǵy prezıdenti Nursultan Nazarbaev jeńgen. Batys baqylaýshylary Qazaqstandaǵy prezıdent saılaýlarynyń eshqaısysyn halyqaralyq standartqa sáıkes ótti dep tanyǵan joq.
