التىن ەمەل ۇلتتىق پاركى مەن بارساكەلمەس قورىعى دۇنيەجۇزىلىك مۇرا تىزىمىنە ەندى، دەپ حابارلايدى “ادىرنا” ءتىلشىسى.
يۋنەسكو-نىڭ دۇنيەجۇزىلىك مادەني جانە تابيعي مۇرانى قورعاۋ جونىندەگى ۇكىمەتارالىق كوميتەت قازاقستان رەسپۋبليكاسى، تۇرىكمەنستان جانە وزبەكستان رەسپۋبليكاسى بىرلەسىپ ەنگىزگەن «تۇراننىڭ سۋىق قىسقى شولدەرى» كوپۇلتتىق نوميناتسياسىنىڭ قۇرامداس بولىكتەرى رەتىندە التىن ەمەل ۇلتتىق پاركى مەن بارساكەلمەس قورىعىنىڭ اۋماقتارىن دۇنيەجۇزىلىك مۇرا تىزىمىنە ەنگىزگەن.
بۇل شەشىم ساۋد ارابياسى كورولدىگىنىڭ استاناسى ءار-ريادتا وتكەن كەڭەيتىلگەن 45-ءشى سەسسياسىندا قابىلدانعان.
كوميتەت سەسسياسىنداعى قازاقستان رەسپۋبليكاسى دەلەگاتسياسىنىڭ مالىمدەسىندە:
«التىن ەمەل مەن بارساكەلمەستىڭ جاڭا حالىقارالىق مارتەبەسى قازاقستاننىڭ ءشولدى ەكوجۇيەلەرىن تەرەڭ عىلىمي زەرتتەلۋىنىڭ جانە قورعاۋ جونىندەگى ءتيىمدى شارالاردى جالعاستىرۋدىڭ، سونداي-اق ەلىمىزدىڭ ورنىقتى جانە جاۋاپتى ءتۋريزمدى دامىتۋداعى الەۋەتىن نىعايتۋدىڭ ماڭىزدىلىعىنا قوسىمشا نازار تارتادى دەپ سەنەمىز»، – دەلىنگەن.
