الماتىلىقتار «ۇلى دالا – كوشپەندىلەر الەمى» ەتنوفەستيۆالىندە كوشپەندىلەردىڭ جاۋىنگەرلىك ويىندارىن، ات سپورتىن جانە ايتىس ونەرىن كوردى. فەستيۆال 2-3 قىركۇيەكتە «بورالداي ساق قورعاندارى» ارحەولوگيالىق ساياباعىندا ءوتتى.
ءىس-شارا قالا كۇنىنە ورايلاستىرىلعان جانە «الماتى – شانحاي ىنتىماقتاستىق ۇيىمىنىڭ مادەني جانە تۋريستىك استاناسى» جوباسىنىڭ ءبىر بولىگى بولىپ تابىلادى.
فەستيۆال قوناقتارى ۇلى دالا كوشپەندىلەرىنىڭ ەجەلگى مادەنيەتى مەن داستۇرلەرىن تاماشالادى. ول ءۇشىن ساياباق اۋماعىندا 50 كيىز ۇيدەن تۇراتىن ءتۇرلى-ءتۇستى ەتنواۋىل بار، قازاقتىڭ ءداستۇرلى «التىباقان» اتكەنشەگى ورناتىلىپ، تاس ديىرمەنى جۇمىس ىستەدى.
باعدارلامادا كوشپەندىلەردىڭ جەكپە-جەك ويىندارى، ات سپورتى ونەرى، ساداقشىلار اراسىنداعى جارىس، ءداستۇردى دارىپتەۋشىلەردىڭ كورمە قويىلىمدارى جانە ت.ب. بار. ۇيىمداستىرۋشىلار سونىمەن قاتار، قوناقتارعا ۇلتتىق تاعامدار مەن قولونەر بۇيىمدارىن دايىنداۋ بويىنشا بايقاۋلار، شەبەرلىك دارىستەرىن ۇسىندى.
ۇلتتىق تاعامدار الاڭى ۇلتتىق تاعامداردىڭ الۋان تۇرلىلىگىن ۇسىنادى: بالقۋىرداق، ءاسىپ، بۇرمەقارىن، ۇلپەرشەك، بالقايماق باۋىرساق، قۇرت، ەت، قىمىز، شۇبات جانە ت.ب.
فەستيۆالدە ازەربايجان، تۇركيا، ماجارستان (ۆەنگريا), مالايزيا، باشقۇرتستان، داعىستان، چۋۆاشيا، التاي، بۋرياتيا، وزبەكستان جانە قىرعىزستاننىڭ ۇزدىك ەتنومۋزىكانتتارى مەن سپورتشىلارى ونەر كورسەتتى.
سونىمەن بىرگە، قوناقتار جىگىتتەر مەن قىزداردىڭ ءان بويىنشا جەكپە-جەگىن، ارمرەستلينگ، ارقان تارتۋ جانە باسقا دا ۇلتتىق ويىندارىن كوردى. كىشكەنتاي قوناقتار ءۇشىن اتتراكتسيوندار، قۋىرشاق تەاترى جانە شەبەرلىك دارىستەرى بار ويىن الاڭى ورىن تەپكەن.
