تالدىقورعاننىڭ «جەتىسۋ» كومانداسىنىڭ باس جاتتىقتىرۋشىسى دميتري وگاي قوستانايلىق «توبىلمەن» ماتچتا تەڭ ويناۋدان كەيىن تورەشىلەرگە نارازىلىعىن اشىق ءبىلدىردى.
- مۇنداي سالماقتى كوماندامەن ويناعاندا، بارىنشا جيناقى ويناۋ كەرەك ەكەنىن تۇسىنەسىڭ. مەن سىزدەرگە قاراپايىم تىلمەن بىلاي تۇسىندىرەيىن: نەشىنشى ماتچ قاتارىنان تۇسىنىكسىز ويىندار مەن باسسىز تورەشىلەر. ەگەر بۇلاي جالعاسا بەرسە، وندا فۋتبولدى ويناكەرەگى نە؟ ءتورت كوماندا بىرىمەن-ءبىرى ويناپ،چەمپيونات وتكىزە بەرسىن، بىرەۋ ءۇشىن قىزىق شىعار. ويىندا تورەشىلەر ويىنا كەلگەنىن ىستەسە دە، سىنعا الىنبايدى. ەگەر جەڭگىسى كەلگەن كوماندا ءبىزدى تازا ويىنمەن ۇتسىن.. سوندا سۇراقتار بولمايدى. تورەشىلەر ءبىزدى ايىپپۇلدان كوز اشتىرمايدى، بۇل جاعدايدا قانداي فۋتبول بولۋى مۇمكىن؟
«توبىل» ونسىز دا وتە جاقسى كوماندا، ماتچتا دا ۇستەمدىگى باسىم بولدى. ال تورەشى نەگە ويىن بويى ءبىز جاققا ىسقىرۋمەن بولدى؟ وسىنى ماعان كىم تۇسىندىرەدى؟ قازاقستان چەمپيوناتىنداعى وسى باسسىزدىقتى توقتاتۋ كەرەك. ويتكەنى بۇل جاقسىلىققا اكەلمەيدى. مەنىڭ عانا ەمەس، بارلىق جاتتىقتىرۋشىلاردا ەموتسيونالدىق جارىلىستار بولادى. ءبىز بۇل ساتتەردى شەشۋگە ءتيىسپىز. ويتكەنى ءبىز مۇندا نە بولىپ جاتقانىن تۇسىنەمىز. نەلىكتەن ءبىر كوماندانى عانا قۇلاعىنان تارتىپ سۇيرەۋ كەرەك؟
ەندى «استانا»، «قايرات»، «توبىل» جانە «ورداباسى» - بىرىنشىلىكتە وسى ءتورت كوماندا ويناي بەرسىن . بولدى! چەمپيونات نە ءۇشىن كەرەك؟ كىم ءۇشىن كەرەك؟ ەگەر، كۇنتىزبەگە قاراساڭىز (قر كۋبوگى) نەگە كەيبىر كوماندالار ءبىرىنشى ليگا كومانداسىمەن عانا نەمەسە كوش سوڭىنداعى كوماندالارمەن وينايدى؟ بۇل جەرەبەنىڭ سوقىرلىعى ما؟ بۇل كۇلكىلى! ءبىزدى اقىماق قىلعىسى كەلەدى. اقىماق ەكەنىمىزدى ميىمىزعا قۇيعىسى كەلەدى. بۇلاي بولمايدى. مەن ءومىر بويى فۋتبولدا جۇرگەن اداممىن. ەگەر ءبارى ءۇنسىز قالسا، وندا بۇل باسسىزدىق جالعاسادى. مەن ءبارىن ايتتىم! - دەدى وگاي.
ەستەرىڭىزگە سالا كەتەيىك، قوستانايداعى «توبىل» - «جەتىسۋ» كەزدەسۋىندە مانتاس كۋكليس بۇرىشتامادان الاڭ يەلەرىنە گول سوققان بولاتىن. بىراق، تورەشى گولدى ەسەپتەمەي قويعان بولاتىن. كەزدەسۋ 0:0 ەسەبىمەن اياقتالدى.
ونىڭ الدىندا شىمكەنتتە "ورداباسى"-"جەتىسۋ" ماتچىندا تورەشى جەتىسۋلىقتاردىڭ تازا گولىن ەسەپكە الماي قويعان بولاتىن.
"ادىرنا" ۇلتتىق پورتالى
