قىتايدىڭ چەندۋ قالاسىندا ءوتىپ جاتقان جازعى ۋنيۆەرسيادادا قازاقستان قۇراماسى العاشقى التىندى قانجىعالادى، دەپ حابارلايدى "ادىرنا" ۇلتتىق پورتالى.
بۇگىن ۋنيۆەرسيدادا 46 كەلى سالماقتا فينالدا تاەكۆوندوشى ريتا باكىشەۆا التىن قانجىعالادى. قازاقستاندىق سپورتشىنىڭ قارسىلاسى 2022 جىلعى الەم چەمپيوناتىنىڭ قولا جۇلدەگەرى بولعان قىتايلىق تايپەيدەن كەلگەن حۋان ين سۋان.
ەسكە سالا كەتەيىك، وتكەن جىلى قازاق تۋريزم جانە سپورت اكادەمياسىنىڭ (الماتى) ستۋدەنتى، 19 جاستاعى باكىشەۆا وتكەن جىلى ازيا چەمپيوناتىندا قولا جۇلدەگە قول جەتكىزىپ، الەم چەمپيوناتىندا جۇلدەگە ءبىر قادام جەتپەي قالعان ەدى. وسى جىلعى بايقاۋدا قازاق قىزى قارىمتا قايتاردى.
ال قازاقستاندىق گيمناست ەلجانا تانيەۆا ەل قورجىنىن تاعى ەكى جۇلدەمەن تولىقتىردى. سپورتشى لەنتامەن جەكەلەي سىندا تەك ۆەنگريا مەن ۋكراينادان كەلگەن قارسىلاستارىنان ۇتىلىپ، "قولا" يەگەرى اتاندى. ال دوپپەن جەكەلەي سىندا بولگاريالىق گيمناستتان باسىم ءتۇسىپ، ۆەنگريالىقتان جەڭىلىپ، كۇمىس جۇلدە جەڭىپ الدى.
دزيۋدوشى بەكارىس سادۋاقاس 2023 جىلعى ۋنيۆەرسيادانىڭ قولا جۇلدەگەرى اتاندى. 100 كەلى سالماقتا ءۇشىنشى ورىن ءۇشىن وتكەن كەزدەسۋدە بەكارىس فرانتسۋز كەنني لەۆەزەدەن باسىم ءتۇستى.
سونداي-اق ديانا تۇرسىنبەك ۋنيۆەرسيادادا ساداق اتۋدان فينالدا ونەر كورسەتتى. شەشۋشى كەزەڭدە ديانانىڭ قارسىلاسى وڭتۇستىككورەيالىق چوي مي سۋن بولدى. ناتيجەسىندە 6:2 ەسەبىمەن وڭتۇستىك كورەيا سپورتشىسى جەڭىسكە جەتتى. وسىلايشا ول التىننان القا تاعىنسا، قازاقستاندىق سپورتشى كۇمىس جۇلدەگەر اتاندى.
جالپى ەسەپ بويىنشا ۋنيۆەرسيادادا قازاقستان قۇراماسى التىن مەدالدان بولەك، 5 كۇمىس جانە 5 قولا مەدال يەلەندى.
"ادىرنا" ۇلتتىق پورتالى
