قازىر ورال كيىكتەرى پوپۋلياتسياسىنىڭ سانى 2 ملن-نان اسىپ كەتتى. وسىعان دەيىن اۋىل-ايماقتان 500 شاقىرىم جەردە مەكەندەيتىن كيىكتەر قازىر ورال قالاسىنان 50-60 شاقىرىم جەردەگى اۋىلدارعا كەلگەن. بۇل تۋرالى «AMANAT» پارتياسىندا وتكەن جيىن بارىسىندا ايتىلدى.
جيىندا ماڭعىستاۋ، باتىس قازاقستان جانە اقتوبە وبلىستارىندا ەكونوميكا، كاسىپكەرلىك جانە اگرارلىق سەكتوردى دامىتۋ ماسەلەلەرى تالقىلاندى. ءۇش ءوڭىردىڭ شارۋالارى مەن كاسىپكەرلەرى بىرنەشە مينيسترلىكتىڭ وكىلدەرىنە ساۋالىن تىكەلەي قويۋعا مۇمكىندىك الدى.
باتىس قازاقستان وبلىستىق ءماسليحاتىنىڭ توراعاسى مۇرات مۇقاەۆ ايماقتاعى شارۋالاردى الاڭداتىپ وتىرعان بىرقاتار پروبلەمانى ورتاعا سالدى. ماسەلەنىڭ ءبىرى وڭىردەگى كيىك پوپۋلياتسياسىنا قاتىستى بولدى. وبلىس اۋماعىندا كيىكتەردىڭ سانى جىل سايىن قارقىندى ءوسىپ كەلەدى. اۋە ساناعىنىڭ قورىتىندىسىنا سايكەس، قازىرگى تاڭدا ورال كيىكتەرىنىڭ سانى 1130 مىڭ باسقا جەتىپ وتىر. بيىلعى تولىمەن قوسقاندا 2 ملن باستان اسۋى ىقتيمال.
«قازىر كيىكتەر سانىنىڭ ارتۋى باتىس قازاقستان وبلىسىنداعى توتەنشە جاعداي دەپ ايتۋعا بولادى. كيىكتەردىڭ كوبەيۋى ولاردىڭ تىرشىلىك ەتۋ ايماعىن كەڭەيتىپ وتىر. ناتيجەسىندە اقجايىق، بوكەي وردا، جانىبەك، جاڭاقالا، كازتالوۆ، تاسقالا جانە بايتەرەك اۋداندارىنىڭ اۋىل شارۋاشىلىق القاپتارى زاقىمداندى. وسىعان بايلانىستى ءتيىستى نورماتيۆتىك-قۇقىقتىق اكتىلەردى قابىلداپ، كيىكتەردىڭ سانىن رەتتەۋ بويىنشا شۇعىل شارالاردى قابىلداۋ قاجەت دەپ سانايمىز»، - دەدى م.مۇقاەۆ.
ونىڭ ايتۋىنشا، وبلىستا كيىكتەردى كورال ادىسىمەن اۋلاپ، ەتىن مال سويۋ كەشەندەرى ارقىلى وڭدەۋ جۇمىسىن پىسىقتاۋ ماقساتىندا بىرنەشە كەڭەس وتكىزىلگەن. وبلىس اۋماعىندا كيىك سويۋعا مۇمكىندىگى بار قۋاتتىلىعى ءارتۇرلى 3 ەت وڭدەۋ كاسىپورىنى جۇمىس ىستەپ تۇر. تەك كيىك سانىن رەتتەۋدىڭ ناقتى مەحانيزمى جوق.
بۇل ماسەلە بويىنشا ەكولوگيا جانە تابيعي رەسۋرستار ءبىرىنشى ۆيتسە-ءمينيسترى نۇركەن شاربيەۆ قازىر كيىكتەردىڭ سانىن رەتتەۋگە قاتىستى ۇكىمەتتىڭ قاۋلىسى ازىرلەنىپ جاتقانىن ايتتى.
«ءبىز بيولوگيالىق نەگىزدى كۇتىپ وتىرمىز. مەحانيزمدەر مەن مەرزىمگە كەلەتىن بولساق، سپورتتىق-اۋەسقويلىق اڭ اۋلاۋ ماسەلەسى قاراستىرىلدى، بىراق زاڭناماعا سايكەس الدىمەن اڭشىلىق شارۋاشىلىقتاردى تىركەۋ قاجەت. ال تىركەۋ وسى كۇزدە جۇرەدى. سايكەسىنشە، بۇل ءىستى بيىل سپورتتىق-اۋەسقويلىق اڭ اۋلاۋ بويىنشا جۇزەگە اسىرۋ مۇمكىن ەمەس. وسى جىل بارلىق اڭشىلىق شارۋاشىلىقتار 15 قىركۇيەكتەن 1 جەلتوقسانعا دەيىن تىركەۋدەن ءوتۋى ءتيىس. سودان سوڭ ينستيتۋتتار كيىكتەردى اۋلاۋدىڭ جاراتىلىستانۋ-عىلىمي نەگىزدەمەسىن ازىرلەيدى»، - دەدى ول.
سونىمەن قاتار، جيىندا اۋىل شارۋاشىلىعى ۆيتسە-ءمينيسترى ابىلقايىر تامابەك وڭىرلەردەگى كاسىپكەرلەر مەن شارۋالاردىڭ مال ازىعىن دايىنداۋعا سۋبسيديا بەرۋ، كۇزگى جيىن-تەرىنگە ارزان باعامەن جانار-جاعارماي الۋ، جايىلىمدىق جانە شابىندىق جەر تاپشىلىعى سياقتى ت.ب. سۇراقتارىنا جاۋاپ بەردى.
