شىعىس قازاقستان وبلىسىنداعى ءۇش بىردەي ەلدى مەكەننىڭ تۇرعىندارىنا ورمانعا كىرۋگە ۋاقىتشا تىيىم سالىندى. بۇل تۋرالى شقو مەملەكەتتىك ءورت باقىلاۋ باسقارماسىنىڭ اعا ينجەنەرى ازامات قۇماربەكوۆ ايتتى، دەپ حابارلايدى “ادىرنا” ۇلتتىق پورتالى.
ەرەكشە ورتكە قارسى رەجيمى قولدانىلۋ كەزىندە ورمان قورىندا ازاماتتارىمىزدىڭ بولۋىنا تىيىم سالىنادى. جانە دە اشىق وت قولدانۋعا، وت جاعۋعا تيىم سالىنادى. قۇرعاق ءشوپتىڭ جانۋىنا جول بەرمەڭىزدەر. ءورت قاۋىپسىزدىك ەرەجەلەرىن ساقتاماعان ءۇشىن اكىمشىلىك جاۋاپكەرشىلىك قاراستىرىلعانىن ەسكە تۇسىرەمىز، – دەدى شقو مەملەكەتتىك ءورت باقىلاۋ باسقارماسىنىڭ اعا ينجەنەرى ازامات قۇماربەكوۆ.
قۋاڭشىلىققا بايلانىستى قاتون-قاراعاي، سامار جانە كۇرشىم اۋداندارىندا ءورت قاۋپىنىڭ ەڭ جوعارى – ءتورتىنشى جانە بەسىنشى دەڭگەيى جاريالانعان. كاتون-قاراعاي ۇلتتىق پاركى مەن ۇلكەن نارىن ورمان شارۋاشىلىعىندا ءتورت باقىلاۋ بەكەتى ورناتىلدى. قۇتقارۋشىلار 46 جەدەل توپقا ءبولىنىپ، توعايلاردى ارالاۋعا شىقتى.
سونداي-اق، رەيد كەزىندە وت جاعىپ، تابيعات اياسىندا ءجۇرۋ ەرەجەسىن بۇزعان 55 تۋريست اكىمشىلىك جاۋاپقا تارتىلدى. جالپى بيىل ەلىمىزدىڭ شىعىسىندا ءىرى 50 ورمان ءورتى تىركەلدى.
ۇقساس جاڭالىقتار
