زيرات باسىندا پارشا-پارشا بولىپ شاشىلعان تەمىرلەردى كورگەن تۇرعىندار دا شوشىپ وتىر.
"وسى زيراتتىڭ قاسىندا تۇرعانىما 35 جىلداي بولدى. مۇنداي ماسقارانى ءبىرىنشى رەت كورۋىم. قۇدايدان دا قورىقپايتىن ادامدار بار. بارلىق شويىن قورشاۋلاردى توناپ كەتكەن. بۇل ءبىر-ەكى ادامنىڭ جۇمىسى ەمەس. تەمىر قابىلدايتىن ورىندار ۇرلانعان زات ەكەنىن ءبىلىپ، قابىلداماۋ كەرەك. سوعان زاڭمەن تىيىم سالىنسا مۇنداي سوراقىلىقتار بولمايتىن ەدى",-دەدى قالا تۇرعىنى امانعازى شاباقوۆ.
بۇل جاعدايعا قاتىستى پوليتسيا تاراپىنان ءىس قوزعالىپ، تەمىر-تەرسەك قابىلداۋ ورىندارىنا تەكسەرۋ جۇمىستارىن جۇرگىزىپ جاتىر.
"گورمولزاۆود" اۋماعىندا ورنالاسقان باۋىرلاستار مازارىنان تەمىر قورشاۋلاردىڭ ۇرلانۋ دەرەگىنە قاتىستى قىلمىستىق كودەكستىڭ 188-بابى بويىنشا سوت الدى تەرگەۋ-تەكسەرۋ امالدارى جۇرگىزىلۋدە. مەتالل قابىلداۋ ورىندارى تەكسەرىلۋدە",-دەدى وبلىستىق ىشكى ىستەر دەپارتامەنتىنىڭ ءباسپاسوز قىزمەتى.
ال زيراتتى سەنىمگەرلىك باسقارۋعا العان مەكەمە پوليتسياعا ارىزدى وزدەرى تۇسىرگەنىن العا تارتتى.
"بۇل ءبىر-ەكى كۇندە بولعان جاعداي. قورشاۋلاردىڭ ۇرلانعانى تۋرالى پوليتسياعا حابار بەردىك. ول جەردى ءبىز 5 جىلعا سەنىمگەرلىككە العان بولاتىنبىز. قازىرگى ۋاقىتتا قالادا 40 -تان اسا زيراتتار بار. بارىندە كەزەكتى تەكسەرىستەر ءوتىپ، تازالىق جۇمىستارى ءجۇرىپ تۇرادى",-دەدى ريتۋالدىق قىزمەت كورسەتۋ مەكەمەسىنىڭ باسشىسى ءسابيت دۇيسەنوۆ.
