اقپارات جانە قوعامدىق دامۋ ءمينيسترى دارحان قىدىرالى «ماسس-مەديا» تۋرالى جاڭا زاڭنىڭ جوباسىندا مەملەكەتتىك تىلگە قانداي باسىمدىقتار بەرۋ ۇسىنىلىپ وتىرعانىن ايتتى، دەپ حابارلايدى «ادىرنا» قازاقپاراتقا سىلتەمە جاساپ.
«بۇعان دەيىن ءباسپاسوز ءتىلى 50/50 قاعيداتىمەن جۇمىس ىستەگەنىن بىلەسىزدەر. ءبىز ونى وزگەرتىپ، قازىر 70/30 بولسىن دەپ جاتىرمىز. «ماسس-مەديا» تۋرالى جاڭا زاڭ قابىلدانسا، بۇكىل اقپارات، جالپى ەلىمىزدىڭ بۇكىل ماسس-مەدياسىنىڭ ءتىلى 70 پايىزى قازاقشا بولادى»، - دەدى مينيستر حالىقارالىق «قازاق ءتىلى» قوعامىنىڭ كەزەكتەن تىس قۇرىلتايىندا.
ۆەدومستۆو باسشىسى مۇنداي تالاپ ءتىل تۋرالى دوكترينا جوباسىنا دا ۇسىنىلعانىن اتاپ ءوتتى.
«سونىمەن قاتار، قازاق ءتىلى تۋرالى دوكترينا ازىرلەنىپ جاتىر. سول دوكتريناعا دا ەنگىزدىك. وسىندا ۆيتسە-مينيستر وتىر. ءتىل تۋرالى دوكترينانىڭ ىشىنە اقپارات سالاسىندا قازاق تىلىنە باسىمدىق بەرۋ تۋرالى ۇسىنىستار ەنگىزدىك»، - دەدى دارحان قىدىرالى.
