پاۆلوداردا بەلگىلى اقىن، جازۋشى حالىقارالىق «رۋح» ادەبي بايقاۋىنىڭ جەڭىمپازى ۇلاربەك نۇرعالىممەن كەزدەسۋ كەشى ءوتتى، دەپ حابارلايدى pavlodarnews.kz ءتىلشىسى.
«Jebe» قوعامدىق بىرلەستىگى جانە «Nur Otan» پارتياسى پاۆلودار وبلىستىق فيليالى جانىنداعى «Jas Otan» جاستار قاناتى ۇيىمداستىرعان شارا بارىسىندا جازۋشى كورەرمەندەردىڭ سۇراقتارىنا جاۋاپ بەرە وتىرىپ، ۇلتتىق بولمىس جايىندا ءسوز قوزعادى. سونداي-اق، جۋىردا جارىق كورگەن «داياعاششى» كىتابىنىڭ تانىستىرىلىمى ءوتتى.
ۇلاربەك نۇرعالىمنىڭ ايتۋىنشا، ءسوز جوعالسا، ۇلت جوعالادى. ال، ۇلتتىق ۇعىمعا تىكەلەي اسەر ەتىپ تۇرعان، بولمىسىمىزعا جاقىنداتاتىن ول – ءان، كۇي، جىر. وعان قوسا، جازۋشى قازاقتا «قايىرشىلىق ۇعىمى» جوق ەكەنىن ايتىپ، كىتاپقا ەنبەگەن اڭگىمەسىن پاش ەتتى.
- اۋىلداعى ادامدار تابيعي اڭگىمەلەر تۋدىرادى، - دەدى ۇلاربەك نۇرعالىم. – قاي اۋىلدا كەدەي جوق. ءبىزدىڭ اۋىلدا ءبىر كەدەي بولدى دەپ ايتپايمىن. كەدەي كوپ بولدى. ونىڭ ىشىندە كەدەيدىڭ ءبىر كەدەيى بولدى. قىرسىق كەدەي ەدى. اعايىندارى كومەكتەسىپ تۇرسا دا، جەتىسپەي جاتادى. اۋىل حالقى شارۋالارى بولسا كومەككە شاقىراتىن. سونى اناۋ «ماعان دۇنيە بەردىڭدەر، سول ءۇشىن شاقىراسىڭدار. بەرەسىڭدەر دە، بۇلدايسىڭدار. مەن قۇلمىن با سەندەرگە» دەپ وزگە اۋىلدارعا قايىر سۇراۋعا شىعادى. بارعان اۋىلىندا رۋىنىڭ بەدەلدى ازاماتى جولىعىپ، ءمان-جايدى بىلگەننەن كەيىن ونى سوققىعا جىعىپ، قويىن بەرىپ، اۋىلىنا اكەپ، كەلەسىدە قايىر سۇراپ شىقسا اياعىن سىندىراتىنىن جەتكىزەدى.
رۋ دەگەن وسىلاي جاماندىقتان تىيۋ ءۇشىن، ۇستاپ وتىرۋ ءۇشىن كەرەك ەدى. قازىر ول باسقا فورماتتا. وسىنداي تىيىم جوقتىعىنان قازىر نە بولماي جاتىر. سونداي-اق ۇلاربەك نۇرعالىم قازاقتىڭ ءداستۇرلى ءانى ادامدى جان-جاقتى ويلانۋعا تاربيەلەيتىنىن ايتتى.
- قازاقتىڭ اندەرىن كەۋدەمىزگە قوندىرا الاتىن بولساق، سونداي راحاتتانامىز، - دەيدى جازۋشى. – باسقا نارسەنىڭ كەرەگى جوق بوپ قالادى. ەسترادا قۇلاعىڭىزعا كىرمەيتىن بولادى. بۇگىندە «اق قايىڭنىڭ تۇبىنە كەل» دەگەن سياقتى قۇيىلا بەرسە، سانا باسقاشا ويلانۋعا تالپىنبايدى. «اندا بارسام جوق، مىندا بارسام دا جوق، تاز بولساڭ دا كەلشى» دەپ بۇرىن قىز سەزىمىن بىلدىرمەگەن. قىزدىڭ قادىرى وسىنشا دارەجەدە تاپتالعان ەمەس. ونى ءبارىمىز ءماز بولىپ تىڭداپ ءجۇرمىز. بۇرىن قىزدىڭ باعاسى بيىك ەدى، قىز قۇرمەتتى ورىندا بولدى. بۇنداي اندەر سانانىڭ تۇيىقتالۋىنا، تىعىرىققا تىرەلۋىنە اكەلەدى. ءورتتىڭ ءوزى سىمنىڭ قىسقا تۇيىقتالۋىنان بولادى. سۋيتسيد جاسايتىن ادامداردىڭ ويلارى تۇيىقتالىپ قالادى. ال، قازاقتىڭ ءبىر انىندە بىرنەشە وي بولادى، تۇسىنگەننىڭ ساناسى سان ءتۇرلى ويعا باتادى.
كەزدەسۋ كەشىنە وڭىرىمىزدەگى جوو-نىڭ، كوللەدج ستۋدەنتتەرى مەن ادەبيەت سۇيەر جاستارى جينالدى. «Nur Otan» پارتياسى وبلىستىق فيليالى توراعاسىنىڭ ءبىرىنشى ورىنباسارى نيكولاي دىچكو اقىنعا ۇلتتىق باعىتتاعى تاربيەگە اتسالىسقانى ءۇشىن العىس حات تابىستادى.
ورازبەك ساياحات
