Pavlodarda belgili aqyn, jazýshy halyqaralyq «Rýh» ádebı baıqaýynyń jeńimpazy Ularbek Nurǵalymmen kezdesý keshi ótti, dep habarlaıdy pavlodarnews.kz tilshisi.
«Jebe» qoǵamdyq birlestigi jáne «Nur Otan» partııasy Pavlodar oblystyq fılıaly janyndaǵy «Jas Otan» jastar qanaty uıymdastyrǵan shara barysynda jazýshy kórermenderdiń suraqtaryna jaýap bere otyryp, ulttyq bolmys jaıynda sóz qozǵady. Sondaı-aq, jýyrda jaryq kórgen «Daıaǵashshy» kitabynyń tanystyrylymy ótti.
Ularbek Nurǵalymnyń aıtýynsha, sóz joǵalsa, ult joǵalady. Al, ulttyq úǵymǵa tikeleı áser etip turǵan, bolmysymyzǵa jaqyndatatyn ol – án, kúı, jyr. Oǵan qosa, jazýshy qazaqta «qaıyrshylyq uǵymy» joq ekenin aıtyp, kitapqa enbegen áńgimesin pash etti.
- Aýyldaǵy adamdar tabıǵı áńgimeler týdyrady, - dedi Ularbek Nurǵalym. – Qaı aýylda kedeı joq. Bizdiń aýylda bir kedeı boldy dep aıtpaımyn. Kedeı kóp boldy. Onyń ishinde kedeıdiń bir kedeıi boldy. Qyrsyq kedeı edi. Aǵaıyndary kómektesip tursa da, jetispeı jatady. Aýyl halqy sharýalary bolsa kómekke shaqyratyn. Sony anaý «maǵan dúnıe berdińder, sol úshin shaqyrasyńdar. Beresińder de, buldaısyńdar. Men qulmyn ba senderge» dep ózge aýyldarǵa qaıyr suraýǵa shyǵady. Barǵan aýylynda rýynyń bedeldi azamaty jolyǵyp, mán-jaıdy bilgennen keıin ony soqqyǵa jyǵyp, qoıyn berip, aýylyna ákep, keleside qaıyr surap shyqsa aıaǵyn syndyratynyn jetkizedi.
Rý degen osylaı jamandyqtan tyıý úshin, ustap otyrý úshin kerek edi. Qazir ol basqa formatta. Osyndaı tyıym joqtyǵynan qazir ne bolmaı jatyr. Sondaı-aq Ularbek Nurǵalym qazaqtyń dástúrli áni adamdy jan-jaqty oılanýǵa tárbıeleıtinin aıtty.
- Qazaqtyń ánderin keýdemizge qondyra alatyn bolsaq, sondaı rahattanamyz, - deıdi jazýshy. – Basqa nárseniń keregi joq bop qalady. Estrada qulaǵyńyzǵa kirmeıtin bolady. Búginde «aq qaıyńnyń túbine kel» degen sııaqty quıyla berse, sana basqasha oılanýǵa talpynbaıdy. «Anda barsam joq, mynda barsam da joq, taz bolsań da kelshi» dep buryn qyz sezimin bildirmegen. Qyzdyń qadiri osynsha dárejede taptalǵan emes. Ony bárimiz máz bolyp tyńdap júrmiz. Buryn qyzdyń baǵasy bıik edi, qyz qurmetti orynda boldy. Bundaı ánder sananyń tuıyqtalýyna, tyǵyryqqa tirelýine ákeledi. Órttiń ózi symnyń qysqa tuıyqtalýynan bolady. Sýııd jasaıtyn adamdardyń oılary tuıyqtalyp qalady. Al, qazaqtyń bir áninde birneshe oı bolady, túsingenniń sanasy san túrli oıǵa batady.
Kezdesý keshine óńirimizdegi JOO-nyń, kolledj stýdentteri men ádebıet súıer jastary jınaldy. «Nur Otan» partııasy oblystyq fılıaly tóraǵasynyń birinshi orynbasary Nıkolaı Dychko aqynǵa ulttyq baǵyttaǵy tárbıege atsalysqany úshin alǵys hat tabystady.
Orazbek Saıahat
