قازاقستان قۇراماسىنىڭ وكىلى ەدۋارد كيم كوركەم جۇزۋدەن جارىستا قولا مەدال جەڭىپ الدى، دەپ حابارلايدى “ادىرنا” پورتالى قازاقستان رەسپۋبليكاسى ۇلتتىق وليمپيادالىق كوميتەتىنىڭ ءباسپاسوز قىزمەتىنە سىلتەپ.
ەدۋارد كيم قازاقستانعا 2023 جىلعى سۋ سپورتىنان الەم چەمپيوناتىندا العاشقى مەدال اكەلگەن سپورتشى.
ول اقتىق سايىستا 216 ۇپاي جيناپ، ءۇشىنشى ورىنعا كوتەرىلگەن.
«ەرلەردىڭ تەحنيكالىق سولو» ديستسيپليناسىندا ەدۋارد كيم الدىن الا ورىنداۋ ناتيجەسى بويىنشا بەسىنشى ورىنعا يەلەنىپ، فينالعا جولداما العان ەدى. فينالداعى ناتيجەسىمەن ول ۇزدىك ۇشتىككە كىرە الدى.
سپورتشىنىڭ جەكە باپكەرى جاننا دەمچەنكونىڭ ايتۋىنشا، قازاقستاندىق سپورتشى ەدۋارد جاقىندا 18 جاسقا تولادى.
كوركەم جۇزۋدەن التىندى يسپاندىق فەرناندو دياس ريو سوتو 224 555, كۇمىس جۇلدەنى امەريكالىق كەننەت گاۋدەت 216 800 ۇپايمەن يەلەندى.
الەم چەمپيوناتى 14 شىلدەدە جاپونيانىڭ فۋكوكا قالاسىندا باستالىپ، 30 شىلدەگە دەيىن جالعاسادى. جەر شارىنىڭ تۇكپىر-تۇكپىرىنەن كەلگەن سپورتشىلار ءجۇزۋ، سۋ دوبى، اشىق سۋدا ءجۇزۋ، سۋعا سەكىرۋ جانە كوركەم ءجۇزۋ بويىنشا 74 مەدال جيىنتىعىن ساراپقا سالماق. قازاقستاننان الەم چەمپيوناتىنا سپورتتىڭ ءتورت تۇرىنەن 50 سپورتشى اتتانعانىن ەستەرىڭىزگە سالامىز.
