وزبەكستان پرەزيدەنتى شاۆكات ميرزيەەۆ 11 شىلدە كۇنى وتكەن ينۆەستيتسيا تارتۋ جونىندەگى كەڭەستە 12 حوكيم مەن 5 شەنەۋنىكتى قىزمەتىنەن الدى. بۇل تۋرالى مەملەكەت باسشىسىنىڭ ءباسپاسوز حاتشىسى شەرزود اسادوۆ ايتتى، دەپ حابارلايدى «ادىرنا» ءتىلشىسى.
«ناۋاي مەن يانگيۋل قالاسىنىڭ حوكيمدەرى، ءامۋداريا، قورعانتەپە، بۇحارا، ميريشكور، شىراقشى، حاتىرشى، پايارىق، اقالتىن، گۇلىستان جانە اققورعان اۋداندارىنىڭ حوكيمدەرى ءوز لاۋازىمىن بوساتتى. باس پروكۋراتۋرا مەن ەسەپ پالاتاسىنا وسى اكىمدەردىڭ قىزمەتىن زەردەلەپ، زاڭنىڭ ۇستەمدىگىن قامتاماسىز ەتۋ تاپسىرىلدى»،—دەدى ول.
بۇل شەشىمگە لاۋازىمدى تۇلعالاردىڭ شەتەلدىك ينۆەستيتسيانى دۇرىس تارتا الماۋى سەبەپ بولعان.
اسادوۆتىڭ ايتۋىنشا، جيىن بارىسىندا ينۆەستيتسيا تارتۋداعى كەمشىلىكتەرگە بايلانىستى اۆتوجول كوميتەتىنىڭ توراعاسى ابدۋراحمون ابدۋاليەۆ، «ۋزبەكيستون تەمير يۋللاري» كومپانياسىنىڭ باسشىسى حۋسنيتدين حوسيلوۆ، «ۋزسۋۆتامينوت»كومپانياسىنىڭ باسشىسى ساحيب سايفنازاروۆ، سۋ شارۋاشىلىعى مەن كولىك ءمينيسترىنىڭ ورىنباسارلارى باحتيار كامالوۆ پەن ابدۋسامات مۋمينوۆ تە قىزمەتتەرىنەن الىنعان.
پرەزيدەنتتىڭ ءباسپاسوز قىزمەتى تاراتقان ۆيدەولاردىڭ بىرىندە، ميرزيەەۆ ولاردىڭ قىزمەتتەن الىنۋىنا "قيانات قىلعانى" سەبەپ بولعانى جايلى ايتقان.
"مەن جۇمىستا قاتەلىك جاساعان ادامدى كەشىرەمىن، بىراق قيانات قىلعان ادامدى ەشقاشان كەشىرمەيمىن",- دەگەن ميرزيەەۆ. سوڭىنان ول "قيانات قىلعانعا ورىن جوق" دەپ نىعىزداي تۇسكەن.
ەسكە سالا كەتەيىك، بۇعان دەيىن وزبەكستان پرەزيدەنتى شاۆكات ميرزيەەۆتىڭ بۇعان دەيىنگى پرەزيدەنتتىك وكىلەتتىگى نولدەستىرىلىپ، جاڭا قىزمەت مەرزىمى ۇزارتىلعانىن جازعان ەدىك. ول جەكسەنبى كۇنى وتكەن پرەزيدەنت سايلاۋىندا سايلاۋشىلاردىڭ 80,1% داۋىسىن جيناپ، جەڭىسكە جەتتى. ەندى ول 7 جىلدىق ەكى مەرزىممەن ەلدى 2037 جىلعا دەيىن باسقارا الادى.
