قازاقستاندىق 2 بوكسشى 3 جىلعا سپورتتان شەتتەتىلدى، دەپ حابارلايدى “ادىرنا”.
قازاقستان قۇراماسىنىڭ ەكى بوكسشىسى دوپينگ قولدانعانى بەلگىلى بولدى. دالىرەك ايتساق جارىستاردا 60 كەلىگە دەيىنگى سالماقتا سىنعا تۇسكەن ءساماتالى تولتاەۆ پەن 67 كەلىگە دەيىنگى سالماقتا باق سىناعان ابزال سەرىك الداعى رينگتەردە باق سىناسپايدى.
ءساماتالىنىڭ دوپينگ سىناماسىنان ورالتۋرينابول، ابزالدىڭ سىناماسىنان مەتاستەرون تابىلىپ وتىر. ەكى پرەپارات تا سپورتشىلاردىڭ قولدانۋىنا تىيىم سالىناعان دارىلەر قاتارىندا. بۇل تۋرالى ۇلتتىق دوپينگكە قارسى ورتالىق مالىمدەدى. ياعني تولتاەۆ 2023 جىلدىڭ 3 ناۋرىزىنان 2026 جىلدىڭ 3 ناۋرىزىنا دەيىن، سەرىك 2023 جىلدىڭ 7 ساۋىرىنەن 2026 جىلدىڭ 7 ساۋىرىنە دەيىن سپورتتان قول ۇزەدى.
بىلعارى قولعاپ شەبەرلەرى بوكستان قازاقستان قۇراماسىنىڭ مۇشەسى. س.تولتاەۆ 2022 جىلعى ازيا چەمپيوناتىندا قولا مەدال يەگەرى بولسا، ابزال سەرىك بىلتىر عانا وتكەن "ەلوردا كۋبوگىندە" چەمپيون اتانعان بولاتىن.
