تايلاند استاناسى بانگكوكتا ازيا وليمپيادا كەڭەسىنىڭ 42-ءشى باس اسسامبلەياسى ءوز جۇمىسىن اياقتادى. ونداعى باستى ماسەلە - باسشىلىق قۇرامدى بەكىتۋ ەدى. داۋىس بەرۋ قورىتىندىسى بويىنشا قازاقستان ۇلتتىق وليمپيادا كوميتەتىنىڭ پرەزيدەنتى تيمۋر قۇلىباەۆ 2023-2026 جىلدار كەزەڭىنە اوك-تىڭ ۆيتسە-پرەزيدەنتى لاۋازىمىنا قايتا سايلاندى.
ەسكە سالا كەتەيىك، تيمۋر قۇلىباەۆ 2015 جىلدان باستاپ اوك-تىڭ ورتالىق ازيا وڭىرىنە توراعالىق ەتەدى، ال 2019 جىلى ارىپتەستەرى ونى وسى لاۋازىمعا قايتا سايلادى. سونداي-اق ول ۇلتتىق وليمپيادا كوميتەتتەرى قاۋىمداستىعىنىڭ ۆيتسە-پرەزيدەنتى جانە حوك-تاعى وليمپيادا 365 (Olympism 365) كوميسسياسىنىڭ مۇشەسى .
كۋۆەيت ۇوك ۇسىنعان شەيح تالال احماد ءال-فاحاد ءال-دجابەر ءال-ساباح (Sheikh Talal Ahmad Al Fahad Al Jaber Al Sabah) پرەزيدەنت بولدى. ول 4 ارتىق داۋىسپەن (24\20) حۋسەين ءال مۋساللامنىڭ (حۋسەين ال مۋساللام) الدىن وراپ ءوتتى .
ازيا وليمپيادا كەڭەسى - حالىقارالىق وليمپيادا كوميتەتى (حوك) مويىنداعان ۇلتتىق وليمپيادا كوميتەتتەرىنىڭ بەس كونتينەنتتىك بىرلەستىكتەرىنىڭ ءبىرى، قازىرگى ۋاقىتتا 45 مەملەكەتتى بىرىكتىرەتىن ازيا ەلدەرىندەگى وليمپيادا قوزعالىسىنىڭ باسقارۋشى ورگانى. ۇيىم اوك-عا مۇشە ەلدەردەگى وليمپيادالىق قوزعالىستاردى ۇيلەستىرىپ، باسقارىپ وتىرادى، ۇنەمى جازعى جانە قىسقى ازيا ويىندارىن، جاعاجاي سپورت ويىندارىن جانە جابىق عيماراتتاعى ويىنداردى وتكىزەدى. اوك ازيا جانە وڭىرلىك ويىنداردى، سونداي-اق حالىقارالىق جارىستاردى وتكىزۋگە جاردەمدەسۋمەن قاتار، ونىڭ مۇشەلەرى مەن ءتيىستى تاراپتاردا تۋىنداۋى مۇمكىن پروبلەمالار مەن داۋلاردى شەشۋدە ۋاكىلەتتى ورگان بولىپ تابىلادى. اوك-تىڭ شتاب-پاتەرى كۋۆەيتتە ورنالاسقان.
"ادىرنا" ۇلتتىق پورتالى
