سپورتشى، ءماجىلىس دەپۋتاتى داۋلەت تۇرلىحانوۆتىڭ ۇلى نۇراسىل بولاتتى اسكەري پوليتسيا قىزمەتكەرلەرى اسكەري بولىمگە ۇستاپ اكەلدى، دەپ حابارلايدى "ادىرنا" پورتالى.
«2023 جىلعى 3 شىلدەدە ىشكى ىستەر ورگاندارى مەن اسكەري پوليتسيا قىزمەتكەرلەرى بىرلەسىپ ۇيىمداستىرعان جەدەل-ىزدەستىرۋ ءىس-شارالارى بارىسىندا بۇرىن اسكەري بولىمنەن رۇقساتسىز قاشىپ كەتكەن قاتارداعى مەرزىمدى قىزمەتتەگى ب-نىڭ تۇرعان جەرى انىقتالدى. اتالعان فاكتى بويىنشا قىزمەتتىك تەكسەرىس جۇرگىزىلۋدە»، - دەپ حابارلادى قورعانىس مينيسترلىگىنىڭ ءباسپاسوز قىزمەتى.
ەسكە سالا كەتەيىك، بۇعان دەيىن تۇرلىحانوۆتىڭ ۇلى نۇراسىل بولاتتىڭ اسكەري بولىمنەن قاشىپ كەتكەنى تۋرالى حابارلانعان بولاتىن. كەيىن بۇل اقپاراتتى قورعانىس مينيسترلىگى رەسمي تۇردە راستادى.
قۇقىق قورعاۋشى اننا چەرنوۆا بولسا، الەۋمەتتىك جەلىدە "ماعان الگىندە عانا ءماجىلىس دەپۋتاتى داۋلەت تۇرلىحانوۆتىڭ ۇلى نۇراسىل بولاتتىڭ اسكەري بولىمنەن قاشىپ كەتكەنى جايلى حابار جەتتى. ول بولىمدە بۇلتارتپاۋ شاراسى بويىنشا ءبولىم باستىعىنىڭ باقىلاۋىندا بولاتىن", – دەپ جازعان.
ونىڭ ايتۋىنشا، دەپۋتاتتىڭ ۇلى 2 شىلدە كۇنى بولىمنەن كولىكپەن شىعىپ كەتكەن.
ەستەرىڭىزگە سالا كەتەيىك، 2023 جىلدىڭ اقپان ايىنىڭ ورتاسىندا قازاقستاندىق زاڭگەر اننا چەرنوۆا الماتىدا كۇيەۋى ەكەۋىن اتاقتى بالۋاننىڭ بالاسى سوققىعا جىققانىن مالىمدەدى. 10 ناۋرىزدا قازاقستاننىڭ باس اسكەري پروكۋراتۋراسى داۋلەت تۇرلىحانوۆتىڭ ۇلىنا قاتىستى ءىستىڭ ءمان-جايىن ايتىپ، سوتقا دەيىنگى تەرگەپ-تەكسەرۋدىڭ باستاعانىن حابارلاعان ەدى.
