قوستاناي وبلىسىنىڭ قاشار اۋىلىندا 75 جاستاعى زەينەتكەر 4-قاباتتاعى پاتەردەن توسەك جاپقىشتارىنان جاسالعان ارقانمەن تومەن تۇسپەك بولعان. ونى بايقاعان كۋاگەرلەر پوليتسياعا حابارلاسقان. بۇل تۋرالى پوليتسيا دەپارتامەنتى مالىمدەدى, دەپ حابارلايدى “ادىرنا” ۇلتتىق پورتالى.
وقيعا ورنىنا ۋچاسكەلىك پوليتسيا ينسپەكتورى تىلەكتەس اۋباكىروۆ جەتكەن. ول دەرەۋ پاتەرگە كوتەرىلگەنمەن، ونىڭ ەسىگى جابىق بولىپتى. سودان كەيىن پوليتسەي جوعارىداعى قاباتتاعى كورشىلەرىنىڭ پاتەرىنە كوتەرىلىپ، زەينەتكەر ايەلمەن سويلەسە باستاعان. ول ۇيدە جالعىز قالعانىن، ۇلىنىڭ ەسىكتى سىرتىنان كىلتتەپ، جۇمىسقا كەتكەنىن ايتادى.
ەسىكتى اشا الماعان ايەل سىرتقا بالكوننان توسەك جاپقىشتارىمەن تۇسكىسى كەلگەن ەكەن.
مەن زەينەتكەرمەن سويلەسە باستادىم. ونى تىنىشتاندىرۋعا تىرىستىم جانە وسى ۋاقىتتا ايەلدىڭ تۋىستارىنا قوڭىراۋ شالا باستادىم. ءبىراز ۋاقىتتان كەيىن ونىڭ جيەنى كەلدى، ونىڭ قوسىمشا كىلتى بولدى، - دەدى ۋچاسكەلىك پوليتسيا قىزمەتكەرى.
زەينەتكەردىڭ ۇلىنا دا بولعان وقيعا تۋرالى حابارلانعان. ول اناسىن مازالاماۋ ءۇشىن سىرتىنان جاۋىپ كەتكەن.
