"ZamZam Qazaqstan" قاجىلىق كومپانياسى ارقىلى ۇلكەن قاجىلىققا اتتانعان ءبىر توپ قازاقستاندىق جالعان ۆيزاعا الدانىپ، قۇجاتسىز تەنتىرەپ ءجۇر، دەپ جازادى "ادىرنا" ءتىلشىسى. بۇل تۋرالى رەداكتسيامىزعا كەلىپ تۇسكەن شاعىمدا ايتىلدى.
"ZamZam Qazaqstan" قاجىلىق كومپانياسى ارقىلى ۇلكەن قاجىلىق تۋرىن ساتىپ العان ب. ەسىمدى ازاماتشا "ادىرنا" رەداكتسياسىنا حابارلاسىپ، اتا-اناسىنىڭ قاجىلىققا اتتانىپ، قۇجاتسىز قالعانىن، كومپانيانىڭ "الداپ سوققانىن" حابارلادى. جابىرلەنۋشى تاراپتىڭ ايتۋىنشا 21 ماۋسىم كۇنى الماتى-شاردجا باعىتىندا "Air Arabia" اۋە كومپانياسى ارقىلى اتتانعان ءبىر توپ قاجىلارعا اتالعان قاجىلىق كومپانياسى جالعان ۆيزا دايىنداپ بەرگەن. ساۋد ارابياسىنىڭ پوليتسەيلەرى مەككە قالاسىنا اۆتوبۋسپەن اتتانعان قازاقستاندىقتاردىڭ قۇجاتتارىن تەكسەرۋ بارىسىندا زاڭسىز قۇجات تىركەپ، 120 ادامدى قاماۋدا ۇستاپ وتىر دەيدى.
"نەشە كۇننەن بەرى ءنار تاتپاعان. اتا-اپالار، ونىڭ ىشىندە مەنىڭ دە اكە-شەشەم كۇننىڭ ىستىعىندا تەنتىرەپ ءجۇر. تۋريستىك ۆيزامەن كەتكەن بولاتىن. سول جاققا جەتكەن سوڭ قاجىلىق ۆيزا الامىز دەگەن بولاتىن. بىراق الماعان. ءۇش ميلليونعا جۋىق قاراجات تولەدىك. ءبىزدىڭ قاراجاتىمىزدى الىپ، الداپ سوعىپ وتىر، كومپانيانىڭ باسشىسىنا جازساق، جاۋاپ بەرمەيدى. گيدتەر تەلەفوندارىن المايدى" دەدى. ب. ەسىمدى ازاماتشا.
اتالعان قاجىلىق كومپانيانىڭ باسشىسى جابىرلەنۋشى تاراپتىڭ ايتقانى بۇرمالانعان دەپ جاۋاپ بەردى رەداكتسيا ساۋالىنا.
"ۇستالعان ەكى اۆتوبۋستاعى قازاقستاندىقتاردىڭ قولىنداعى جالعان ۆيزانى مۇفتياتتاعى قانداي ادام جاساتقانى بەلگىسىز. ءبىزدى جىعىپ سالىپ وتىر. ۇزاق زەرتتەلۋى كەرەك ماسەلە" دەدى دانيار يلەەۆ.
پوليتسيا ءىستى ءالى تىركەمەگەنى جانە جابىرلەنۋشى تاراپتىڭ ارىزىن تولىق قاراماعانى ايتىلدى.
جاعدايدىڭ انىق-قانىعى ءالى دە ناقتىلانۋدا. وقيعاعا قاتىستى تىڭ اقپاراتتار قوسىمشا حابارلانادى.
ەسكە سالا كەتەيىك، بۇعان دەيىن "كاۋسار ترەۆەل" قاجىلىق كومپانياسىنىڭ باسشىسى 1000-نان اسا ادامنان قارجى جىمقىرىپ، الداپ سوققانى ايتىلعان بولاتىن. كەيىننەن كومپانيا باسشىسى مەدەت مۇراتبايۇلى الماتىداعى جالدامالى پاتەرلەردىڭ بىرىندە ۇستالدى.
پوسموترەت ەتۋ پۋبليكاتسيۋ ۆ Instagram
