Facebook جەلىسىندە تاراعان سۋرەتتەگى ورتتەن قالعان اعاشتاردى تاسىپ بارا جاتقان شقو نومىرىندەگى كولىك جۇرگىزۋشىسى "ادىرنا" رەداكتسياسىنا حابارلاسىپ وقيعانىڭ سەمەي ورتىنە قاتىسى جوق ەكەنىن ايتتى، دەپ حابارلايدى "ادىرنا" ءتىلشىسى. سۋرەت ەركەجان تۇرسىنباەۆا ەسىمدى قولدانۋشىنىڭ پاراقشاسىندا جاريالانعان بولاتىن.
ەركەجان تۇرسىنباەۆا ەسىمدى جەلى قولدانۋشىسىنىڭ پاراقشاسىندا اعاش بورەنەلەردى تاسىپ بارا جاتقان شقو نومىرىندەگى كولىكتىڭ سۋرەتى قوعامدا قىزۋ تالقىعا ءتۇستى. اتالمىش جايت "ادىرنادا" جاريالانعان سوڭ، سۋرەتتەگى جۇك كولىگىنىڭ جۇرگىزۋشىسى بايلانىسقا شىعىپ فوتوداعى بورەنەلەردىڭ سەمەي ورمانىنداعى ورتكە ەش قاتىسى جوق ەكەنىن مالىمدەدى.
"سۋرەت 13 ماۋسىم كۇنى سەمەيگە كىرە بەرىس جەردە تۇسىرىلگەن. بۇل اعاشتار قوستانايداعى اۋليەكول ماڭىنداعى ورتتەن قالعان بورەنەلەر. كولىك قازىر تۇراقتا تۇر. قوستانايلىق اعاشتار ەكەندىگىنىڭ دالەلى رەتىندە ءمورى جانە قۇجاتتارى دا تۇگەل" دەپ جاۋاپ بەردى ب. ەسىمدى ازامات.
سوڭىنان بەرىلگەن پوليتسەي مالىمەتىنە قاراعاندا بۇل وقيعادا ەشقانداي زاڭ بۇزۋشىلىق بولماعان. بورەنە تيەگەن كولىككە قاتىستى قۇجاتتار دا دۇرىس. تاراپتار الەۋمەتتىك جەلىلەر مەن باق-تا تەك رەسمي اقپارات كوزىنەن مالىمەت الۋعا شاقىرعان.
ەسكە سالا كەتەيىك، 2022 جىلدىڭ 2 قىركۇيەگىندە قوستاناي وبلىسىندا اۋماعى 43 مىڭ گەكتاردى قۇراعان ورمان ءورتى ورىن العان بولاتىن. بارلىعى 2091 ادام ەۆاكۋاتسيالانىپ، 12 ادام ءورت كەزىندە جەڭىل جانە ورتاشا اۋىرلىقتاعى جاراقاتتار، كۇيىكتەر الىپ، ۋلانعان. 1935 جىلى تۋعان ءبىر ادام قازا تاپتى. ەكى ەلدى مەكەندەگى 91 تۇرعىن ءۇي جانىپ كەتتى. ورتتى 700-دەن اسا قۇتقارۋشى ءسوندىردى. 7 قىركۇيەك كۇنى ساعات 15:00-دە قوستاناي وبلىسىندا بولعان ءىرى ءورت ءوشىرىلدى.
