بۇگىندە سىر وڭىرىندە ەگىن ەگۋ ناۋقانى قىزۋ جۇرۋدە. بيىل وبلىس بويىنشا 195,6 مىڭ گەكتار جەرگە اۋىل شارۋاشىلىعى داقىلدارىن ورنالاستىرۋ جوسپارلانۋدا. ونىڭ ىشىندە نەگىزگى داقىل كۇرىشتىڭ كولەمى - 83,9 مىڭ گەكتاردى قۇرايدى. جالپى وسى جىلى ەگىس كولەمىن - 7,0 مىڭ گەكتارعا، كۇرىش كولەمىن - 5,3 مىڭ گەكتارعا، مال ازىقتىق داقىلداردى - 2,3 مىڭ گەكتارعا ۇلعايتۋ مەجەلەنۋدە. ال اباي اۋىلىنداعى «اقجول» شارۋاشىلىعى بيىل 250 گەكتار جەرگە ەگىن ەككەن. شارۋاشىلىق بريگاديرىنىڭ ايتۋىنشا، وڭىردەگى سۋ تاپشىلىعىنا قاراماستان ءار گەكتاردان 60 تسەنتنەردەن جوعارى ءونىم الۋدى كوزدەپ وتىر. بۇگىن وڭىرلىك كوممۋنيكاتسيالار قىزمەتىنىڭ ۇيىمداستىرۋىمەن وتكەن كوشپەلى بريفينگتە باق وكىلدەرى اتالمىش شارۋاشىلىقتىڭ جۇمىس بارىسىمەن تانىستى.
— ءبىزدىڭ «اقجول» شارۋاشىلىعى 1997 جىلدان بەرى كۇرىش ەگۋمەن اينالىسىپ كەلەدى. سوڭعى جىلدارى وڭىردەگى سۋ تاپشىلىعى سالدارىنان شارۋاشىلىقتاعى ەگىس كولەمى ءبىرشاما قىسقاردى. دەگەنمەن، ءبىز قولدا بار مۇمكىندىكتى پايدالانا وتىرىپ، 250-300 گەكتارعا دەيىن ەگىن ەگۋدەمىز. جالپى ءبىزدىڭ شارۋاشىلىقتا 15 ادام ەڭبەك ەتەدى. بۇگىندە مۇنداعى جۇمىسشىلار سىر سالىسىن تولىق سۋعا باستىرىپ، 100 گەكتار جەرگە جوڭىشقا ەكتى. ەككەن ءار گەكتاردان جىل سايىن 60 تسەنتنەردەن جوعارى ءونىم جينايمىز. شارۋاشىلىقتا جالپى سانى 6 تەحنيكا قامتاماسىز ەتىلگەن، - دەدى «اقجول» شارۋاشىلىعىنىڭ ءوندىرىس بريگاديرى جەتپىسباي ەردەنوۆ.
وبلىستا ەگىن ەگۋ جۇمىستارى 15 ناۋرىزدان باستالعان بولاتىن. بۇگىنگى كۇنگە دەيىن 80,5 مىڭ گەكتار جەرگە نەگىزگى داقىل كۇرىشتىڭ ءدانى سەبىلىپ، ونىڭ 72,0 مىڭ گەكتارى سۋعا باستىرىلدى. ال داندىك جۇگەرى - 210 گەكتارعا، سۇرلەمدىك جۇگەرى - 420 گەكتارعا، كۇنباعىس - 45 گەكتارعا، سويا - 64 گەكتارعا، كارتوپ - 1,7 مىڭ گەكتارعا، كوكونىس - 3,7 مىڭ گەكتارعا ەگىلدى. جالپى 3 979 بىرلىك اۋىل شارۋاشىلىعى تەحنيكاسى تولىق جوندەۋدەن وتكىزىلىپ، كوكتەمگى ەگىن ەگۋ ناۋقانىنا قاتىسۋدا.
