جامبىل وبلىسىندا اعىمداعى جىلى مادەنيەت سالاسىنا 11,9 ملرد. تەڭگە ءبولىنىپ، 14 نىساننىڭ قۇرىلىسى جانە 4 نىسانعا كۇردەلى جوندەۋ جۇمىستارى جۇرگىزىلۋدە. ناتيجەسىندە جىل قورىتىندىسىمەن حالىقتىڭ مادەني ينفراقۇرىلىممەن قامتاماسىز ەتۋ دەڭگەيى 84,8 پايىزعا جەتەتىن بولادى. بۇل تۋرالى ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا جامبىل وبلىسىنىڭ اكىمى نۇرجان نۇرجىگىتوۆ ايتتى، دەپ حابارلايدى “ادىرنا” ۇلتتىق پورتالى.
سونىمەن قاتار، وبلىس اۋداندارىنداعى مادەنيەت ۇيلەرىنە قازىرگى تاڭدا قوسىمشا 94 شتات بەرىلىپ، 143 ۇيىرمە اشىلدى.
جالپى، 2027 جىلعا قاراي وبلىستاعى 34 ەلدى مەكەنگە مادەنيەت ءۇيىن سالىپ، وڭىردەگى مادەنيەت نىساندارىنىڭ قاجەتتىلىگىن 100 پايىزعا جەتكىزۋ كوزدەلۋدە.
وبلىس اكىمى جاستار ساياساتىنىڭ جۇزەگە اسۋ بارىسىنا توقتالىپ، اعىمداعى جىلدىڭ العاشقى ءتورت ايىندا وڭىردەگى 10022 جاس جۇمىسپەن قامتۋدىڭ بەلسەندى شارالارىنا تارتىلسا، «اۋىل اماناتى» جوباسى اياسىندا 344 جاس 2,5 پايىزبەن جەڭىلدەتىلگەن نەسيە العانىن جەتكىزدى.
- كاسىپكەرلىك باستامالارىن قولداۋ ءۇشىن 347 جاسقا 1 ميلليارد 735 ميلليون تەڭگە جەڭىلدەتىلگەن تارتىپپەن جىلدىق ءوسىمى 2,5 پايىزدىق شاعىن نەسيە بەرىلۋدە. قازىرگى تاڭدا جالپى 616,1 ميلليون تەڭگەگە 134 جوبا ماقۇلدانعان. سونىمەن قاتار، «جاسىل ەل» ەڭبەك جاساعىنا 136,2 ميلليون تەڭگە ءبولىنىپ، 1900 جۇمىسسىز، ۋاقىتشا بوس جۇرگەن NEET ساناتىنداعى جاستاردى ماۋسىمدىق جۇمىستارعا تارتۋ كوزدەلۋدە،-دەدى نۇرجان نۇرجىگىتوۆ.
جامبىل ءوڭىرىنىڭ ءبىر ەرەكشەلىگى رەتىندە – يۋنەسكو-نىڭ تىزىمىنە ەنگەن تاريحي ورىندارى كوپ، تابيعاتى باي ايماق ەكەندىگىن اتاپ وتكەن وبلىس باسشىسى وبلىستىڭ تۋريزم سالاسىنا دا توقتالىپ ءوتتى.
ايتا كەتەيىك، وتكەن جىلى تاراز قالاسى دۇنيەجۇزىلىك قولونەرشىلەر قالالارىنىڭ تىزىمىنە ەنىپ، قازاقستاننىڭ العاشقى قولونەرشىلەر قالاسى ستاتۋسىنا يە بولعان بولاتىن.
قازىرگى تاڭدا ءوڭىردىڭ تۋريزم سالاسىندا 7,4 ملرد.تەڭگەگە 6 ينۆەستيتسيالىق جوبالار ىسكە اسىرىلۋدا. اعىمداعى جىلى 1,2 ملرد. تەڭگەگە «المالى» دەمالىس ورتالىعى جانە «Koksai resort» دەمالىس ايماقتارى ىسكە قوسىلدى.
ايماق بامسشىسى ءوز سوزىندە وبلىس ورتالىعى – تاراز قالاسىندا اتقارىلىپ جاتقان جۇمىستاردى قىسقاشا باياندادى.
-ءبىز يميدجدىك جوبالاردان باس تارتىپ، بار كۇشىمىزدى الەۋمەتتىك ماسەلەلەردى شەشۋگە جۇمساپ وتىرمىز. بۇگىندە قالاداعى 2 كوشەنى قايتا جاڭعىرتۋ، 118 كوشەنى ورتاشا جوندەۋدەن وتكىزۋ، قالانىڭ بارلىق يرريگاتسيا جۇيەلەرىن قالپىنا كەلتىرۋ، 7 تۇرعىن القاپتا اۋىز سۋ قۇبىرىنىڭ قۇرىلىسى جانە 2 تەمىر جول وتكەلىن سالۋعا سمەتالىق قۇجاتتار ازىرلەۋ سياقتى اۋقىمدى جوبالار ىسكە اسۋدا،-دەدى نۇرجان نۇرجىگىتوۆ.
