دزيۋدودان رەسپۋبليكالىق تۋرنير ءوتتى

1959
Adyrna.kz Telegram

قىزىلوردا وبلىسى، سىرداريا اۋدانىنا قاراستى ن.ءىلياسوۆ اۋىلدىق وكرۋگىندە دزيۋدودان رەسپۋبليكالىق تۋرنير ءوتتى. اتالمىش جارىسقا 11 وبلىستان 334 سپورتشى جانە 27 كوماندا قاتىستى. بۇل تۋرالى وڭىرلىك كوممۋنيكاتسيالار قىزمەتىنىڭ اقپاراتتىق الاڭىندا وتكەن بريفينگتە وبلىستىق مادەنيەت جانە سپورت باسقارماسى باسشىسىنىڭ ورىنباسارى اسىلجان جامانقۇل مالىمدەدى.

-قازاقستاندا دزيۋدو 1973 جىلدان باستاپ دامي باستادى. دزيۋدو ەڭ الدىمەن، جاۋىنگەرلىك ونەردىڭ لاقتىرۋ ءستيلى. ونى ءبولىپ كورسەتەتىن باستى ەرەكشەلىكتەردىڭ ءبىرى - ولارعا قارسى قارسىلاستىڭ كۇشىن قولدانۋ تاجىريبەسى. وسىنداي تاجىريبەلەردى جيناقتاعان سپورتشى جاستار ەلىمىزدە وتە كوپ. كوپشىلىككە ۇلگى ەتىپ، باتىلدىعىن ايقىنداۋ ماقساتىندا ءبىراز جارىستار دا ءوتىپ جاتىر. سونىڭ ءبىرى «ابزال جانە ك» جشس-ءنىڭ ۇيىمداستىرۋىمەن وتكەن دزيۋدودان رەسپۋبليكالىق ءتۋرنيرى. 19-21 مامىر ارالىعىندا بولعان تۋرنير وتە جوعارى دارەجەدە ءوتتى،-دەدى اسىلجان زۇلفقارۇلى.

-تۋرنيرگە قاتىسۋشىلارعا بارلىق جاعداي جاسالدى. ناقتىراق ايتقاندا، ترانسپورت جانە جاتىن ورنى، 3 مەزگىل تاماعى قاراستىرىلدى. ايتا كەتەتىن جايت، جارىسقا جالپى 4 ميلليونعا جۋىق قاراجات جۇمسالدى. جىل سايىن ءوز دەڭگەيىندە ءوتىپ جاتقان بۇل جارىس اۋىل حالقى ءۇشىن ماڭىزدى شارالاردىڭ ءبىرى. وسىنداي مۇمكىندىككە قولداۋ كورسەتىپ وتىرعان «ابزال جانە ك» مەكەمەسىنىڭ ءرولى زور. اۋىلىمىزدا كۇرىش القاپتارىنىڭ دامىپ جاتقانىن ەسكەرسەك، باسقا وڭىرلەردەن كەلگەن قاتىسۋشىلار دەنساۋلىققا پايدالى، ساپالى كۇرىش تەك شەت ەلدە عانا ەمەس ءوز وڭىرىمىزدە وندىرىلەتىندىگى جونىندە ءبىراز اقپاراتپەن تانىس بولدى. سوندىقتان بۇل جارىس سپورت سالاسىنا باۋلىپ قانا قويماي، اۋىل شارۋاشىلىعىن جانە ءتۋريزمدى دامىتۋعا ۇلكەن ۇلەس قوسقانى حاق ، - دەدى "ابزال جانە ك" جشس-ءى ديرەكتورىنىڭ ورىنباسارى ايگۇل قوسمۇراتوۆا.

-تۋرنيرگە ارنايى حالىقارالىق، ۇلتتىق تورەشىلەر شاقىرتىلدى. سەبەبى، شىن مىقتىنى ءادىل تۇردە ايقىنداۋ نەگىزگى ماقساتتىڭ ءبىرى. جەڭىمپازدارعا اقشالاي سىيلىقتار جانە قر سپورت شەبەرىنە ۇمىتكەر اتاعى بەرىلدى. بيىل ون ەكىنشى رەت وتكىزىلگەن ءتۋرنيردى الداعى ۋاقىتتا حالىقارالىق دەڭگەيگە دەيىن كوتەرۋ جوسپاردا بار،-دەدى ن.ءىلياسوۆ اۋىلىنىڭ سپورت كەشەنىنىڭ مەڭگەرۋشىسى باعلان مىعىمباەۆ.

@وڭىرلىك كوممۋنيكاتسيالار قىزمەتى

پىكىرلەر