Qyzylorda oblysy, Syrdarııa aýdanyna qarasty N.Ilııasov aýyldyq okrýginde dzıýdodan respýblıkalyq týrnır ótti. Atalmysh jarysqa 11 oblystan 334 sportshy jáne 27 komanda qatysty. Bul týraly Óńirlik kommýnıkaııalar qyzmetiniń aqparattyq alańynda ótken brıfıngte oblystyq mádenıet jáne sport basqarmasy basshysynyń orynbasary Asyljan Jamanqul málimdedi.
-Qazaqstanda dzıýdo 1973 jyldan bastap damı bastady. Dzıýdo eń aldymen, jaýyngerlik ónerdiń laqtyrý stıli. Ony bólip kórsetetin basty erekshelikterdiń biri - olarǵa qarsy qarsylastyń kúshin qoldaný tájirıbesi. Osyndaı tájirıbelerdi jınaqtaǵan sportshy jastar elimizde óte kóp. Kópshilikke úlgi etip, batyldyǵyn aıqyndaý maqsatynda biraz jarystar da ótip jatyr. Sonyń biri «Abzal jáne K» JShS-niń uıymdastyrýymen ótken dzıýdodan respýblıkalyq týrnıri. 19-21 mamyr aralyǵynda bolǵan týrnır óte joǵary dárejede ótti,-dedi Asyljan Zulfqaruly.
-Týrnırge qatysýshylarǵa barlyq jaǵdaı jasaldy. Naqtyraq aıtqanda, transport jáne jatyn orny, 3 mezgil tamaǵy qarastyryldy. Aıta ketetin jaıt, jarysqa jalpy 4 mıllıonǵa jýyq qarajat jumsaldy. Jyl saıyn óz deńgeıinde ótip jatqan bul jarys aýyl halqy úshin mańyzdy sharalardyń biri. Osyndaı múmkindikke qoldaý kórsetip otyrǵan «Abzal jáne K» mekemesiniń róli zor. Aýylymyzda kúrish alqaptarynyń damyp jatqanyn eskersek, basqa óńirlerden kelgen qatysýshylar densaýlyqqa paıdaly, sapaly kúrish tek shet elde ǵana emes óz óńirimizde óndiriletindigi jóninde biraz aqparatpen tanys boldy. Sondyqtan bul jarys sport salasyna baýlyp qana qoımaı, aýyl sharýashylyǵyn jáne týrızmdi damytýǵa úlken úles qosqany haq , - dedi "Abzal jáne K" JShS-i dırektorynyń orynbasary Aıgúl Qosmuratova.
-Týrnırge arnaıy halyqaralyq, ulttyq tóreshiler shaqyrtyldy. Sebebi, shyn myqtyny ádil túrde aıqyndaý negizgi maqsattyń biri. Jeńimpazdarǵa aqshalaı syılyqtar jáne QR sport sheberine úmitker ataǵy berildi. Bıyl on ekinshi ret ótkizilgen týrnırdi aldaǵy ýaqytta halyqaralyq deńgeıge deıin kóterý josparda bar,-dedi N.Ilııasov aýylynyń sport kesheniniń meńgerýshisi Baǵlan Myǵymbaev.
@Óńirlik kommýnıkaııalar qyzmeti
