قىتايدىڭ باس كەدەن باسقارماسى ۆلاديۆوستوكتى ىشكى ساۋدا ءۇشىن ترانزيتتىك پورت دەپ جاريالادى. بۇل تۋرالى رەسني سىرتقى ىستەر مينيسترلىگى ۆلاديۆوستوكتاعى وكىلدىگىنىڭ مالىمدەمەسىنە سىلتەمە جاساپ جاريالادى، دەپ حاباردايدى “ادىرنا” ۇلتتىق پورتالى.
بۇدان بىلاي قىتايدىڭ ءبىر پروۆينتسياسىنان ەكىنشى پروۆينتسياسىنا تاسىمالداناتىن تاۋارلار ۆلاديۆوستوك ارقىلى كەدەندىك ءراسىمسىز وتەدى.
شەشىم 1 ماۋسىمدا كۇشىنە ەنەدى جانە قىتايدىڭ سولتۇستىك-شىعىسىنان وڭتۇستىككە تاسىمالداناتىن تاۋارلارعا قاتىستى بولادى. ەگەر بۇرىن رەسەي فەدەراتسياسىمەن شەكتەسەتىن تسزيلين پروۆينتسياسىنان تاۋارلار ادەتتە قىتايدىڭ قاراما-قارسى شەتىنە 1000 شاقىرىمدى ەڭسەرىپ، سارى تەڭىز پورتتارىنا جونەلتىلەتىن بولسا، قازىر ولاردى ءبىر-ەكى ءجۇز كيلومەترگە دەيىن تاسىمالداۋعا بولادى. وندا كونتەينەرلەر كەمەلەرگە قايتا تيەلىپ، الۋشىعا جىبەرىلەدى.
قىتاي ءۇشىن سولتۇستىك-شىعىستان وڭتۇستىككە قاراي لوگيستيكالىق جولدىڭ قۇرلىقتاعى بولىگىن بەس ەسەگە قىسقارتۋ مۇمكىندىگى وتە ماڭىزدى: ەلدە ءوندىرىستىڭ قارقىندى ءوسۋىن كوزدەيتىن سولتۇستىك-شىعىس قىتايداعى ونەركاسىپتى جاڭعىرتۋدىڭ ستراتەگيالىق جوسپارى بەكىتىلدى. بىراق ۆلاديۆوستوك ينفراقۇرىلىمى جۇك تاسىمالىنىڭ ۇلعايۋىنا توتەپ بەرە مە، جوق پا، ازىرگە بەلگىسىز.
وتكەن جىلدىڭ قىركۇيەك-جەلتوقسان ايلارىندا ۆلاديۆوستوك پورتىندا كەپتەلىس پايدا بولىپ، كەمەلەر ەكى اپتا بويى جۇك ءتۇسىرۋدى كۇتۋگە ءماجبۇر بولدى. كۇزگە قاراي كولىك كەپتەلىسى قايتا تۋىنداۋى مۇمكىن.
