قىتايدىڭ وڭتۇستىگىندەگى مەگاپوليستەردەن «راگاسا» تايفۋنىنا بايلانىستى 2 ميلليونعا جۋىق ادام ەۆاكۋاتسيالاندى، دەپ حابارلايدى «ادىرنا» ءتىلشىسى CNN تەلەارناسىنا سىلتەمە جاساپ.
ءزىلزالا تايۆاندى دا شارپىعان. بۇل ايماقتا 14 ادام قازا تاۋىپ، 129 ادام حابار-وشارسىز كەتكەن.
ەكپىندى جەلدىڭ جىلدامدىعى ساعاتىنا 168 كم-گە جەتكەن. تەلەارنا مالىمەتىنشە، تايفۋن گونكونگتىڭ قارجى ورتالىعىن، ءفيليپپيننىڭ الىس ارالدارىن جانە تايۆاننىڭ تاۋلى ايماقتارىن تۇرالاتىپ تاستاعان. گونكونگ پەن ماكاودا داۋىلعا قاتىستى ەڭ جوعارى دەڭگەيدەگى ەسكەرتۋ جاريالاندى.
قازىرگى تاڭدا تايفۋن تۋدىرعان كوشكىندەر مەن الىپ تولقىندار قىتايدىڭ گۋاندۋن پروۆينتسياسىنا جاقىنداپ كەلەدى. مۇندا شەنچجەن جانە گۋانچجوۋ سياقتى ءىرى قالالار ورنالاسقان. 23 قىركۇيەكتە وسى وڭىردە جەلدىڭ ەكپىنى ساعاتىنا 181,44 كم-گە دەيىن جەتتى.
«سينحۋا» اگەنتتىگىنىڭ حابارلاۋىنشا، «راگاسا» تايفۋنى 2025 جىلعى 18-ءشى داۋىل بولىپ تىركەلگەن. الايدا 21 قىركۇيەكتە كۇشەيىپ، سۋپەرتايفۋنعا اينالعان. قحر توتەنشە جاعدايلاردى باسقارۋ مينيسترلىگىنىڭ جەدەل توبى گۋاندۋن پروۆينتسياسىنا دەرەۋ جىبەرىلدى.
بۇعان دەيىن 24 تامىزدا قىتايعا «كادزيكي» تايفۋنى سوققان بولاتىن. حاينان ارالىندا جەلدىڭ جىلدامدىعى سەكۋندىنا 46 مەترگە (166 كم/ساع) جەتىپ، كولىكتەردىڭ اۋدارىلۋىنا جانە اعاشتاردىڭ قۇلاۋىنا اكەلگەن ەدى.
