بۇگىن الماتىدا «جاستار رۋحى» جاستار قاناتىنىڭ ۇيىمداستىرۋىمەن «AMANAT CUP» XXI رەسپۋبليكالىق پىكىرسايىس ءتۋرنيرى باستالدى. ءىس-شارانىڭ اشىلۋ سالتاناتىنا «AMANAT» پارتياسىنىڭ حاتشىسى داۋلەت كارىبەك، «جاستار رۋحى» جق توراعاسى نۇرجان جەتپىسباەۆ، «تۇران» ۋنيۆەرسيتەتىنىڭ رەكتورى، جوعارى وقۋ ورىندارى قاۋىمداستىعىنىڭ پرەزيدەنتى راحمان الشانوۆ، پارتيانىڭ الماتى قالالىق فيليالىنىڭ توراعاسى ستانيسلاۆ كانكۋروۆ، قالالىق ءماسليحات دەپۋتاتتارى جانە جاستار ۇيىمدارىنىڭ وكىلدەرى قاتىستى.
ءوز كەزەگىندە، داۋلەت كارىبەك پىكىرسايىس سىني ويلاۋدى دامىتىپ قانا قويماي، ادامنىڭ وي-ءورىسى مەن ەرۋديتسياسىن كەڭەيتۋگە ىقپال ەتەتىنىن اتاپ ءوتتى.
«بارلىق كوماندا ايماقتاردا ىرىكتەۋدەن ءوتىپ، مۇندا ەڭ مىقتى، ەڭ لايىقتى ءسوز شەبەرلەرى جينالدى. كوپ ادام پىكىرسايىس نە ءۇشىن كەرەك دەپ سۇرايدى. پىكىرسايىس ادامنىڭ ءوز ويىن دۇرىس تۇجىرىمداۋعا، ءوز پىكىرىن قالىپتاستىرۋعا جانە ونى اۋديتورياعا جەتكىزۋگە ۇيرەتەدى. بۇل اسىرەسە ءوز ءومىرىن ساياسي نەمەسە قوعامدىق قىزمەتپەن بايلانىستىرعىسى كەلەتىندەر ءۇشىن قاجەت»، - دەدى پارتيا حاتشىسى.
ەكى كۇنگە سوزىلاتىن تۋرنيرگە قازاقستاننىڭ بارلىق ايماعىنان 60 كوماندا قاتىسادى. پىكىرسايىس الماتىداعى تۇران ۋنيۆەرسيتەتىندە وتۋدە. تۋرنير ىرىكتەۋ كەزەڭى مەن پلەي-وفف، قازاقستاندىق جانە رەسەيلىك ستۋدەنتتەر ليگاسىنان تۇرادى. «جاستار رۋحى» ۇيىمىنىڭ توراعاسى نۇرجان جەتپىسباەۆتىڭ ايتۋىنشا، جىل ساناپ ۇزدىك پىكىرسايىسشى اتاعىن يەلەنۋگە نيەت بىلدىرۋشىلەر قاتارى ارتىپ كەلەدى.
«10 جىلدان استام ۋاقىتتان بەرى ءسوز قادىرىن بىلەتىن اۋەسقويلار ءبىزدىڭ الاڭدا كەزدەسىپ ءجۇر. «AMANAT CUP» جاستاردىڭ ازاماتتىق سانا-سەزىمىن، سونداي-اق جالپى پىكىرسايىس قوزعالىسىن دامىتۋعا ىقپال ەتەدى. وسى تۋرنيرگە 150-گە جۋىق كوماندا ءوتىنىم بەردى. الايدا سولاردىڭ تەك 60-ى عانا قاتىسىپ جاتىر. بيىل ءبىز تالقىلاناتىن ماسەلەلەر تىزىمىنە بۋكمەكەرلىك كەڭسەلەردىڭ زيانى، قازاقستاندىق عىلىمدى دامىتۋ ماسەلەسى، الەۋمەتتىك جەلىلەردىڭ ماڭىزدىلىعى تۋرالى بىرقاتار تاقىرىپتى قوسۋدى ءجون كوردىك. كەلەسى جىلى ويىن جەڭىمپاز كوماندانىڭ ايماعىندا وتەدى»، - دەدى ول.
ايتا كەتەيىك، ەكىنشى جىل قاتارىنان وتكىزىلىپ جاتقان دەبات ءتۋرنيرى يسلام ىنتىماقتاستىعى ۇيىمى جاستار فورۋمىنىڭ ەۋرازيالىق وڭىرلىك ورتالىعىنىڭ قولداۋىمەن جۇزەگە اسىرىلىپ جاتىر. جەڭىمپازدار مەن جۇلدەگەرلەردىڭ ەسىمى ەرتەڭ بەلگىلى بولادى.
