ءماجىلىس دەپۋتاتى نارتاي ارالبايۇلى پرەمەر-مينيستر ءاليحان سمايىلوۆ پەن باس پروكۋرور بەرىك اسىلوۆقا دەپۋتاتتىق ساۋال جولدادى. ول ءماجىلىستىڭ جالپى وتىرىسىندا وقۋشىلار اراسىنداعى الىمجەتتىك ماسەلەسىن كوتەردى، دەپ حابارلايدى «ادىرنا» ءتىلشىسى.
ايتۋىنشا، سوڭعى ۋاقىتتا جاسوسپىرىمدەر اراسىندا الىمجەتتىك كوبەيىپ، ولاردىڭ سوڭى ادام ولىمىمەن اياقتالىپ جاتىر. دەپۋتات قايعىلى وقيعالاردىڭ بىرقاتارىن ءتىزىپ ءوتتى.
«الماتى وبلىسىنداعى ساتى اۋىلىندا بولعان قايعىلى وقيعا توبە شاشىمىزدى تىك تۇرعىزدى. الدىمەن، 10-سىنىپ وقۋشىسىنىڭ كوز جۇمعانىن ەستىدىك. قايعىلى وقيعاعا جوعارى سىنىپ وقۋشىسىنىڭ قايعىلى وقيعاسى سەبەپ بولعان. سۇمدىعى سول، مارقۇم بولعان 10-سىنىپ وقۋشىسىنىڭ جەرلەۋىنەن كەيىن ونىڭ دوسى، سىنىپتاسى دا ءوز وزىنە قول سالىپ، قايتىس بولدى. ءساۋىر ايىنىڭ باسىندا تۇركىستان وبلىسى تورتكۇل اۋىلىندا سۋ كانالىنان 15 جاستاعى قىزدىڭ ءولى دەنەسى تابىلدى. 9 سىنىپتا وقىعان ءجاسوسپىرىمدى ءولتىردى دەگەن كۇدىكپەن 2 ادام ۇستالدى»،—دەدى ول.
نارتاي ارالبايۇلى باس پروكۋرور بەرىك اسىلوۆتان جوعارىدا اتالعان ىستەردى قاتاڭ باقىلاۋعا الۋدى سۇرادى.
«ايىپتىلاردىڭ جازادان قۇتىلىپ كەتپەۋىن سۇرايمىز. الىمجەتتىك فاكتىلەرىن بىلە تۇرسا جاسىرىپ قالعان قىزمەتتەگى ازاماتتاردىڭ دا جازاعا تارتىلۋى كەرەك. وعان قوسا، بالالاردى قورلاپ جاتقان كەزدە اراشا ءتۇسۋدىڭ ورنىنا سول ارەكەتتەردى بەينەتاسپاعا ءتۇسىرىپ جاريالاعان ادامداردى دا جازالاۋ قاجەت. جانە ايىپتى وقۋشىلاردىڭ اتا-انالارى دا ءتيىستى جازاسىن الۋى كەرەك»،—دەدى دەپۋتات.
بۇدان بولەك، ول پرەمەر-مينيسترگە دە ءوز ۇسىنىستارىن ايتتى.
«مەكتەپتە ارنايى ينسپەكتور بولعاندا عانا ىشتەگى ءتارتىپتىڭ جاقساراتىنىن تاجىريبە كورسەتتى. سوندىقتان مەكتەپ ينسپەكتورلارىن قايتارۋ كەرەك. بالالاردى الىمجەتتىككە توزبەۋگە، ەگەر قىسىم جاسالسا ارنايى مامانعا جۇگىنۋگە ۇيرەتۋ كەرەك. «ارىزداۋعا بولمايدى، تاياق جەگەنىڭدى ايتۋ ۇيات» دەگەن سىندى قىلمىستىق وتكەنى بار تۇسىنىكتەردى جويۋ كەرەك. سونداي-اق وقۋ مەن تاربيەنىڭ بىرتۇتاستىعىن قامتاماسىز ەتەتىن جۇيە قالىپتاسۋى ءتيىس. ءاربىر ءپاننىڭ تاربيەلىك فۋنكتسياسى، ءاربىر مۇعالىمنىڭ تاربيەلىك جاۋاپكەرشىلىگى بولۋى ءتيىس. قازىرگى جاعدايدا ۇكىمەتتىڭ «ازاماتتىق قىزمەتشىلەرگە، مەملەكەتتىك بيۋدجەت قاراجاتى ەسەبىنەن ۇستالاتىن ۇيىمداردىڭ قىزمەتكەرلەرىنە، قازىنالىق كاسىپورىنداردىڭ قىزمەتكەرلەرىنە ەڭبەكاقى تولەۋ جۇيەسى تۋرالى» №1193 قاۋلىسىنىڭ 4-قوسىمشاسىنىڭ نەگىزىندە سىنىپ جەتەكشىلەرگە 1-4 سىنىپتار ءۇشىن 8800 تەڭگە (بازالىق لاۋازىمدىق جالاقىنىڭ 50 پايىزى), 5-11 سىنىپتار مەن كوللەدجدەر ءۇشىن 10600 تەڭگە (بازالىق لاۋازىمدىق جالاقىنىڭ 60 پايىزى) كولەمىندە قوسىمشا اقى بەلگىلەنگەن. مۇعالىمدەردىڭ ساباقتا جانە ساباقتان تىس ۋاقىتتا بالالاردىڭ تاربيەسىمەن جۇيەلى اينالىسۋى ءۇشىن كەيبىر مامانداندىرىلعان مەكتەپتەردەگىدەي ارنايى كۋراتور شتاتتىق بىرلىگىن بارلىق مەكتەپكە ەنگىزىپ، ولاردىڭ لايىقتى ايلىق جالاقىسىن جانە ستاتۋسىن ايقىنداۋىڭىزدى سۇرايمىز»،—دەدى دەپۋتات.
