ساراپشىلار ۇزدىك ەلدەردى انىقتاۋ ءۇشىن تۇرعىنداردىڭ ساتىپ الۋ قابىلەتتىلىگىن، قاۋىپسىزدىك كورسەتكىشتەرىن، دەنساۋلىق ساقتاۋ دەڭگەيىن، ءومىر ءسۇرۋ باعاسىن، جىلجىمايتىن مۇلىك باعاسىن، جولعا كەتەتىن ورتاشا ۋاقىتىن، لاستانۋ دەڭگەيى مەن كليماتتى زەرتتەدى.
ءومىر ءسۇرۋ ساپاسى رەيتينگىندەگى العاشقى ءۇش ورىندى دانيا، شۆەيتساريا جانە فينليانديا يەلەندى. سونداي-اق ۇزدىك وندىققا اۆستراليا، اۆستريا، نيدەرلاندى، يسلانديا، گەرمانيا، جاڭا زەلانديا، نورۆەگيا ەندى. جاپونيا مەن اقش ۇزدىك وندىقتان تىس قالىپ، سايكەسىنشە 12-ءشى جانە 13-ءشى ورىندارعا جايعاستى. سوڭعى 71-ورىن مىسىرعا «بۇيىردى».
ليتۆا 29-شى، لاتۆيا 34-ءشى ورىننان كورىنسە، ەستونيا جاپونيا مەن اقش-تى باسىپ وزىپ، 11-ورىن الدى. بەلارۋس 2019 جىلدىڭ رەيتينگىندە 37-ءشى، رەسەي 59-شى، ۋكراينا 62-ءشى ورىندى يەلەنىپتى. قازاقستان 69-ورىندى يەلەنىپ، سوڭىنان ساناعاندا «ۇزدىك» ۇشتىككە ەنگەن.
ايتا كەتەيىك، مەملەكەت باسشىسى نۇرسۇلتان نازارباەۆ تاياۋدا «قازاقستاننىڭ 100 جاڭا ەسىمى» جوباسىنىڭ كەزەكتى جەڭىمپازدارىمەن كەزدەسۋدە: «قازىرگى ۋاقىتتاعى باسقا جۇرت جەلەتىن بولسا، ءبىز شابۋىمىز كەرەك. سەبەبى ءبىز قالىپ قالعان ەلمىز. ول ءبىزدىڭ كەمشىلىك ەمەس. تاريح، تاعدىر ءبىزدى سولاي ەتتى»، – دەگەن ەدى.
بۇعان دەيىن Global Finance جۋرنالى الەمدەگى قاۋىپسىز ەلدەردى اتاعان بولاتىن. ول كەزدە قازاقستان وزگە تمد ەلدەرىن باسىپ وزىپ، رەيتينگتە 44-ءشى ورىن الدى.
