"اباي قۇنانبايۇلىنىڭ ۇرپاعى اۋلا سىپىرۋشى بولىپ جۇمىس ىستەپ ءجۇر. ادامزاتتىڭ ويشىلى اتانعان ۇلى بابامىزدىڭ ۇرپاعى وسىنداي الەۋمەتتىك تاۋقىمەتتە جۇرگەنى ۇلتتىعىمىزعا، ەلدىگىمىزگە سىن ەمەس پە". بۇل تۋرالى اقىن، پۋبليتسيست جاناربەك ءاشىمجان ءوزىنىڭ فەيسبۋك پاراقشاسىندا جازدى، دەپ حابارلايدى "ادىرنا" ۇلتتىق پورتالى.
"تالعار تاۋلارىن باۋرايلاپ كەلە جاتقانبىز. دارحان دەيتىن كاسىپكەر ءىنىم كەنەتتەن "اباي اتامىزدىڭ ايدوس دەيتىن ۇرپاعىنان حابارىڭىز بار ما؟" دەگەنى… كەزىندە دانيار ەسىمدى شوپشەگىنىڭ سۇحباتىن وقىعانمىن، ايدوس دەگەن ۇرپاعىنان حابارىم جوق ەكەن. ويلانىپ قالدىم. سوسىن "اباي قۇنانبايۇلىنىڭ اقىلباەۆ ايدوس دەگەن تىكەلەي ۇرپاعى بار، وسى الماتىدا تۇرادى…" دەدى. "مۇمكىن بولسا بارىپ سالەم بەرسەك قالاي بولار ەكەن؟.." دەدىم. تەلەفونىنا حابارلاسىپ ەدى، جۇمىس ورنىندا ەكەن. رۇقسات سۇرادىق. قارسى بولمادى. باردىق. جۇپىنىلاۋ كيىنگەن دەمبەلشە كىسى اۋلاعا شىقتى. كەڭىرەك تانىستىق. اڭگىمەلەستىك. قازاقشاعا شورقاقتاۋ ەكەن. اسىلدىڭ سىنىعى، التىننىڭ ۇنتاعى ەمەس پە، بولمىسىنان تەكتىلىك، زيالىلىق، اقسۇيەكتىك اڭقىپ تۇر. كوزىنىڭ وتى بار. ۇلى باباسىنا كەلبەتى دە كەلەتىندەي. بويىن جامان ادەتتەردەن مۇلدە اۋلاق ۇستايتىنىن ايتتى. "اباي اتامنىڭ تۇقىمى ەكەنىمدى كوپ ادامعا ايتپايمىن، مىنا مەيرامحاناداعىلار دا بىلمەيدى. 2020 جىلى بابامنىڭ 175 جىلدىعىندا سەمەيگە باردىم. "اباي بالالارىمەن" دەگەن ەسكەرتكىشتىڭ اشىلۋى بولدى. اقىلباي اتام مەن تۇراعۇل اتامدى ەكى قاپتالىنا العان بابامنىڭ ەسكەرتكىشى كەرەمەت شىعىپتى. وسىنى ارنايى تاپسىرىپ، جاساتقانى ءۇشىن ەل پرەزيدەنتى قاسىم-جومارت توقاەۆقا ۇرپاقتارى اتىنان ەرەكشە ريزامىن! " - دەدى ايدوس اعامىز. الماتىنىڭ "ارباتىنداعى" ءمالىم مەيرامحانالاردىڭ بىرىندە اۋلا سىپىرۋشى بولىپ جۇمىس ىستەيدى ەكەن. ەڭبەكاقىسى - 150 مىڭ تەڭگە. وسىنى ەستىگەندە جانىمىز جۇدەپ، كوڭىلىمىز الاي-دۇلەي بولىپ كەتتى…",- دەپ جازدى جاناربەك ءاشىمجان.
ايدوس اقىلباەۆ 1967 جىلى الماتى قالاسىندا دۇنيەگە كەلىپتى. ۋكراينانىڭ ايگىلى كريۆوي روگ قالاسىنداعى اۆياتسيالىق ۋچيليششەدە وقىعان ەكەن. وقۋ بىتىرگەندە كەڭەستەر وداعى كۇيرەگەن، سوسىن بۇيىرعان جۇمىستارمەن اينالىسىپتى. جالعىز قىزى - الەكساندرا وسى كۇندەرى ساراتوۆ قالاسىنىڭ تۇرادى.
شەجىرە بويىنشا: اباي – اقىلباي – الىمقۇل – باعفۇر – ەرنەست – ايدوس.
ياعني، ايدوس اعامىز - اباي اتامىزدىڭ نەمەنەسى بولادى.
"ايدوس اعامىزدىڭ جۇمىسى ساعات 16.00-دە اياقتالادى ەكەن. بىلىنەر-بىلىنبەس سەبەزگىلەپ جاۋىپ تۇرعان جاڭبىر دا توقتاعان. "ۇيىڭىزگە دەيىن شىعارىپ سالايىق" دەپ ەدىك، قارسى بولمادى. از ۋاقىت كۇتتىك. شاعىنداۋ دورباسىن كوتەرىپ شىقتى. ءتيىستى مەكەن-جايعا الىپ كەلدىك. بەس قاباتتى كونە ءۇيدىڭ بەسىنشى قاباتىندا ءبىر بولمەلى ۇيدە زايىبىمەن تۇراتىنىن ايتتى... ۇلى ابايدىڭ سوڭعى تۇياعى عوي. دانيار دەگەن نەمەرە باۋىرى بارىن ايتتى، كوپ جىلداردان بەرى بايلانىستارى جوق سەكىلدى. ەركەك اتاۋلىدان قالعان وسى ەكەۋى عانا ەكەن. ادامزاتتىڭ ويشىلى اتانعان ۇلى بابامىزدىڭ ۇرپاعى وسىنداي الەۋمەتتىك تاۋقىمەتتە جۇرگەنى ۇلتتىعىمىزعا، ەلدىگىمىزگە سىن ەمەس پە؟!. ويلانايىق!", - دەدى اقىن.
"ادىرنا" ۇلتتىق پورتالى
