دەموكراتيالىق ينستيتۋتتار مەن ادام قۇقىقتارى جونىندەگى ەقىۇ بيۋروسىنىڭ سايلاۋالدى باقىلاۋ ميسسياسىنىڭ جەتەكشىسى يوگان ميورفي قازاقستاندا وتكەن ءماجىلىس جانە ءماسليحات سايلاۋىنا قاتىستى ءوز پىكىرىن ءبىلدىردى، دەپ حابارلايدى «ادىرنا» BAQ.KZ-كە سىلتەمە جاساپ.
باقىلاۋ ميسسياسىن باسقارامىن، نەگىزگى كوماندا استانا قالاسىندا. ءبىز قازاقستاندا قاڭتاردان بەرى قىرىق كۇندەي جۇمىس ىستەدىك. كاسىبيلىگى ءۇشىن ارىپتەستەرىمە العىس ايتامىن. سايلاۋالدى ناۋقان بەلسەندى ءوتتى. قۇقىقتىق بازاعا كوپتەگەن وزگەرتۋ ەنگىزىلدى. ەكى جاڭا پارتيا قاتىستى. جالپى العاندا سايلاۋ جاقسى ءوتتى، - دەپ اتاپ ءوتتى باقىلاۋ ميسسياسىنىڭ جەتەكشىسى.
سونىمەن قاتار ول ساياسي وقيعاعا قاتىستى سىني پىكىرىن دە جاسىرىپ قالمادى.
ماڭىزدى كەپىلدىكتەر بۇرمالاندى. قورىتىندىلارىن (سايلاۋدىڭ - رەد.) رەسمي وتىرىسقا دەيىن جاسايتىنى الاڭداتادى. نەگىزى ولار پرەزيدەنتتىڭ رەفورمالارىن قولدادى. ءوزىن-ءوزى ۇسىنعان كانديداتتار قارقىندى بولدى. سوت ارقىلى قايتا تىركەلگەنى دە كەزدەستى. ولار ناۋقان بارىسىندا اكىمشىلىك كەدەرگىلەرگە دە تاپ بولدى. بۇل ولاردىڭ جۇمىسىنا كەدەرگى كەلتىرگەنى ءسوزسىز. سوتتا ولار ءوز قۇقىقتارىن قورعاسا دا، تىركەۋدەن الىپ تاستالدى. سونىمەن قاتار 3 تەلەدەبات وتكىزىلدى. ايتقىم كەلەتىنى، جالعىز باقىلاۋشىلار ءبىز عانا بولعان جوقپىز. كەيبىر بىزبەن كەزدەسكەن باقىلاۋشىلار تاراپىنان الاڭداۋشىلىقتار بولدى، - دەدى يوگان ميورفي.
ايتۋىنشا، جاقىندا ساياسي پارتيالاردى تىركەۋگە قويۋ تالاپتارى ءىشىنارا دياقب-نىڭ الدىڭعى ۇسىنىسىنا سايكەس جەڭىلدەتىلدى.
دەگەنمەن ءالى دە ساياسي پارتيالار رەتىندە سايلاۋعا قاتىسۋعا رۇقسات ەتىلمەگەندەردىڭ بولۋى الاڭداتۋشىلىق تۋعىزادى جانە دەموكراتيالىق سايلاۋدىڭ حالىقارالىق ستاندارتتارىنا سايكەس كەلمەيدى. سايلاۋ كۇنى داۋىس بەرۋ بىرقالىپتى ۇيىمداستىرىلدى. بىراق داۋىستاردى ساناۋ مەن قورىتىندىلاۋ پروتسەسىندە ايتارلىقتاي پروتسەدۋرالىق بۇزۋشىلىقتار بايقالدى. ميسسيا ءالى ەكى اپتا قالىپ جۇمىس ىستەيدى، - دەيدى ەقىۇ وكىلى.
