«AMANAT»-تىڭ اتىنان دەپۋتاتتىققا كانديداتتار جانە پارتيا بەلسەندىلەرى سۋ باسقان ۇيلەردىڭ تۇرعىندارىمەن كەزدەسىپ، گۋمانيتارلىق كومەك كورسەتۋ ءۇشىن باتىس قازاقستان جانە اقتوبە وبلىستارىنا باردى. بۇل تۋرالى پارتيانىڭ اتقارۋشى حاتشىسى ەلنۇر بەيسەنباەۆ Facebook پاراقشاسىندا مالىمدەدى.
«وتكەن اپتادا پارتيانىڭ رەسپۋبليكالىق شتابىنىڭ مۇشەلەرى ۇگىت-ناسيحات ناۋقانى كەزىندە وسى وبلىستارعا بارىپ، وڭىردەگى سۋ تاسقىنىنىڭ سالدارىن ءوز كوزىمەن كوردى. «AMANAT» بۇل جاعدايدى ۇنەمى باقىلاۋدا ۇستادى. سوندىقتان داۋىس بەرۋ اياقتالا سالىسىمەن، پارتيالىقتار وسى ايماقتارعا قايتا جول تارتتى. اماناتتىقتار ينفراقۇرىلىم نىساندارى مەن جولداردىڭ جاي-كۇيىن تەكسەرەدى. ولار زارداپ شەككەندەردىڭ بارلىعى كەلتىرىلگەن زالال ءۇشىن وتەماقى الىپ، ايماقتاعى جاعدايدى قالپىنا كەلتىرۋ ءۇشىن قاجەتتى كومەك تۋرالى اقپارات جينايدى»، – دەلىنگەن حابارلامادا.
ەلنۇر بەيسەنباەۆ پارتيا باعدارلاماسىندا ەلىمىزدەگى ينفراقۇرىلىمدى جاڭعىرتۋ، قالا مەن اۋىل تۇرعىندارىن ماۋسىمدىق سۋ تاسقىنىنان قورعاپ، گيدروتەحنيكالىق قۇرىلىستار جۇيەسىندە ءتارتىپ ورناتۋ كوزدەلگەنىن اتاپ ءوتتى.
«پارتيا ءوزىنىڭ سايلاۋالدى باعدارلاماسىن ىسكە اسىرۋعا كىرىسىپ كەتتى جانە بۇگىندە اسا وزەكتى بولىپ وتىرعان ماسەلەنى تىكەلەي توتەنشە جاعداي ورىن العان ايماققا بارىپ شەشپەك. حالىقتى تولعاندىراتىن ماسەلەلەردى شەشۋ – «AMANAT» پارتياسىنىڭ ءبىرىنشى كەزەكتەگى مىندەتى. ءبىز ءاردايىم حالىقپەن بىرگەمىز!» – دەپ اتاپ ءوتتى پارتيانىڭ اتقارۋشى حاتشىسى.
