كونستيتۋتسيالىق كەڭەس نازارباەۆتىڭ ساۋالىنا جاۋاپ بەردى، - دەپ حابارلايدى Tengrinews.kz ءتىلشىسى ۆەدومستۆو سايتىنا سىلتەمە جاساپ.
ەسكە سالايىق، مەملەكەت باسشىسىنىڭ وتىنىشىندە كونستيتۋتسيانىڭ 42-بابىنىڭ 3-تارماعىندا بەلگىلەنگەن قازاقستان رەسپۋبليكاسى پرەزيدەنتىنىڭ وكىلەتتىگىن مەرزىمىنەن بۇرىن توقتاتۋ نەگىزدەرىنىڭ تىزبەسى تولىق بولىپ تابىلادى ما، دەگەن سۇراق قويىلعان بولاتىن. كونستيتۋتسيالىق كەڭەس اتالعان نورمادا پرەزيدەنتتىڭ وكىلەتتىگىن مەرزىمىنەن بۇرىن توقتاتۋ نەگىزدەرى تولىق ەمەس ەكەنىن ءتۇسىندىردى.
"كەڭەستىڭ پىكىرىنشە، نەگىزگى زاڭنان مەملەكەت باسشىسىنىڭ وتستاۆكاعا شىعۋ قۇقىعى تۋىندايدى. اتالعان قۇقىق پرەزيدەنتتىك باسقارۋ نىسانى مەن رەسپۋبليكا پرەزيدەنتىنىڭ كونستيتۋتسيالىق مارتەبەسىنىڭ ەلەمەنتى بولىپ تابىلادى. ول ادام ءارى قازاقستان ازاماتى رەتىندە پرەزيدەنتكە تيەسىلى جانە ءار تۇلعانىڭ كونستيتۋتسيالىق قۇقىقتارىن، سونىڭ ىشىندە ەڭبەك ەتۋ بوستاندىعىنا، قىزمەت پەن كاسىپ ءتۇرىن ەركىن تاڭداۋىنا قۇقىعىن بەكىتەتىن كونستيتۋتسيانىڭ باسقا دا ەرەجەلەرىنەن تۋىندايدى (13-باپتىڭ 1-تارماعى، 24-باپتىڭ 1-تارماعى جانە ت.ب.). كونستيتۋتسيالىق كەڭەس كونستيتۋتسيا 42-بابىنىڭ 3-تارماعىنداعى "سونداي-اق پرەزيدەنت قىزمەتىنەن مەرزىمىنەن بۇرىن بوساتىلعان...جاعدايدا..." دەگەن ءسوز تىركەسى ونىڭ وكىلەتتىگىن مەرزىمىنەن بۇرىن توقتاتۋدىڭ نەگىزى رەتىندە مەملەكەت باسشىسىنىڭ وتستاۆكاعا شىعۋىن دا قامتيدى دەپ ەسەپتەيدى", - دەپ مالىمدەلگەن كەڭەستىڭ سايتىندا.
نورماتيۆتىك قاۋلىنىڭ تولىق ءماتىنى باسپاسوزدە جاريالانادى.
ايتا كەتەيىك، وسىعان دەيىن قازاقستان پرەزيدەنتى نۇرسۇلتان نازارباەۆ كونستيتۋتسيالىق كەڭەسكە بەرگەن وتىنىشىنە قاتىستى مالىمدەمە جاساعان ەدى. "كونستيتۋتسيالىق كەڭەسكە بەرگەن وتىنىشىمە بايلانىستى قىسقا عانا جاۋاپ قايتارعىم كەلەدى. 1995 جىلدان بەرى، ياعني كونستيتۋتسيا قابىلدانعالى بەرى كونستيتۋتسيالىق كەڭەسكە 200 ءوتىنىش كەلىپ تۇسكەن. ولاردىڭ 22-ءسى - مەنىڭ پرەزيدەنتتىك ءوتىنىشىم. بۇل قالىپتى پروتسەسس. كونستيتۋتسيالىق كەڭەس تە سول ءۇشىن قۇرىلعان. كەڭەستەگىلەردىڭ كونستيتۋتسياداعى، زاڭدارداعى كەمشىلىكتەردى تالقىلاۋعا قۇقىعى بار. (...)", - دەگەن ەدى نازارباەۆ. سونداي-اق، پرەزيدەنت قازاقستاندا سايلاۋدىڭ مەرزىمىنەن بۇرىن وتپەيتىنىن ايتتى. ارينە، بۇل بارلىعى ءۇشىن قىزىق... ەڭ قىزىق دەگەن سۇراقتار - سايلاۋ، ترانزيت. كونستيتۋتسيانى وقىڭىزدار، پرەزيدەنت جايلى زاڭداردى وقىڭىزدار. وندا بارلىعى ناقتى كورسەتىلگەن. مەرزىم كەلگەندە سايلاۋ وتەدى. ءيا، كونستيتۋتسيا بويىنشا پرەزيدەنتتىڭ مەرزىمىنەن بۇرىن سايلاۋ وتكىزۋگە قۇقىعى بار. بىراق بىزدە ولاي بولمايدى. تىنىشتالىپ، دۇرىس جۇمىس ىستەيىك", - دەدى مەملەكەت باسشىسى.
