الماتى قالاسىندا ماتەماتيكادان ازيا-تىنىق مۇحيتى جانە «جىبەك جولى» حالىقارالىق وليمپيادالارى ءوز مارەسىنە جەتتى، دەپ حابارلايدى «ادىرنا» ءتىلشىسى وقۋ-اعارتۋ مينيسترلىگىنە سىلتەمە جاساپ.
«دارىن» رەسپۋبليكالىق عىلىمي-پراكتيكالىق ورتالىعىنىڭ حابارلاۋىنشا، ەكى بىردەي حالىقارالىق ءبىلىم سايىسىنا قازاقستاننىڭ بارلىق وڭىرىنەن 157 وقۋشى قاتىسىپ، 57 جۇلدەگەر انىقتالدى.
«بۇل حالىقارالىق وليمپيادالار قاشىقتىقتان ۇيىمداستىرىلدى. قاتىسۋشى ەلدەردىڭ ۇيىمداستىرۋ كوميتەتتەرى تاپسىرمالاردىڭ شارتتارىن جانە باعالاۋ كريتەريلەرىن حالىقارالىق ۇيىمداستىرۋ كوميتەتىنەن الىپ، ءوز ەلدەرىندە وليمپيادالاردى ءبىر ۋاقىتتا دەربەس وتكىزدى. بۇل فورمات كوپتەگەن وقۋشىلاردىڭ حالىقارالىق جارىستارعا قاتىسىپ، ءوز بىلىمدەرىن سىناۋعا مۇمكىندىك بەرىپ وتىر»،– دەيدى «دارىن» رعپو ديرەكتورىنىڭ ورىنباسارى نۇرلان جۇماگەلدى.
ايتا كەتەيىك، ازيا-تىنىق مۇحيتى حالىقارالىق وليمپياداسىنا ارگەنتينا، اۆستراليا، كانادا، گونكونگ، يندونەزيا، جاپونيا، قازاقستان، كورەيا، مالايزيا، اقش، تۇركيا، مەكسيكا سەكىلدى 38 ەل قاتىساسا، «جىبەك جولى» وليمپياداسىندا ۇلى جىبەك جولى بويىندا ورنالاسقان ەلدەردىڭ دارىندى وقۋشىلارى سىنعا ءتۇستى.
