1,3 ميلليون قازاقستاندىقتىڭ موينىندا 17 ملرد تەڭگە سالىقتىق قارىز بار.
بۇل تۋرالى قارجى مينيسترلىگىنىڭ القا ماجىلىسىندە ءمالىم بولدى. مينيستر ءاليحان سمايىلوۆتىڭ سوزىنشە، 2019 جىلدىڭ 1 قاڭتارىنداعى دەرەك بويىنشا 1,3 ميلليون ادام 17 ملرد تەڭگە كولەمىندەگى سالىقتىق قارىزدى ارقالاپ ءجۇر. ونىڭ 5 ملرد تەڭگەسى – ءوسىمپۇل.
«وسىعان وراي سالىق كودەكسىنە وزگەرتۋلەر ەنگىزىلەدى. سالىقتىق راقىمشىلىقتى وسى جىلدىڭ سوڭىنا دەيىن وتكىزۋ كەرەك. امنيستيا كولىك، جەر، مۇلىك سالىقتارىن قامتيدى. نەگىزگى سالىقتىق قارىزدى وتەگەن ادامداردىڭ ءوسىمپۇلى كەشىرىلەدى»، – دەپ تولىقتىردى ءسوزىن باس قارجىگەر.
ەسكە سالا كەتەيىك، بيىل مەملەكەت باسشىسىنىڭ تاپسىرماسىنا سايكەس، شاعىن جانە ورتا بيزنەس سۋبەكتىلەرىنە سالىقتىق راقىمشىلىق جاريالانعان بولاتىن. بۇل باعىتتاعى جۇمىستار 2019 جىلدىڭ 1 قاڭتارىنان باستاپ جۇزەگە اسىرىلۋدا.
«سالىقتىق راقىمشىلىققا 90 مىڭعا جۋىق كاسىپكەر ىلىگەدى. بۇگىندە 28,5 مىڭ كاسىپكەر 6 ملرد تەڭگە كولەمىندەگى قارىزىن وتەدى. تيىسىنشە، ولاردىڭ 1,3 ملرد تەڭگە شاماسىنداعى ءوسىمپۇلى مەن ايىپپۇلى كەشىرىلەدى»، – دەدى ءاليحان سمايىلوۆ.
شاعىن جانە ورتا بيزنەس سۋبەكتىلەرىنە ارنالعان سالىقتىق راقىمشىلىققا 2018 جىلدىڭ 1 قازانىنا دەيىن جيناقتالعان 358 ملرد تەڭگە كولەمىندەگى قارىز جاتقىزىلعان بولاتىن. قازاقستاندا تاۋەلسىزدىك العالى بەرى ءۇش مارتە سالىقتىق راقىمشىلىق جاسالعان. العاشقى امنيستيا 1997-1999 جىلدارى وتكىزىلسە، ەكىنشى، ءۇشىنشى اكتسيالار سايكەسىنشە، 2011 جانە 2015 جىلدارى ۇيىمداستىرىلعان. سالىقتىق راقىمشىلىقتىڭ ناتيجەسىندە بيزنەس وكىلدەرى قوماقتى قارىزدان قۇتىلىپ، كاسىپتەرىن قايتا جانداندىرۋعا مۇمكىندىك الدى.
فارحات امىرەنوۆ
