استانا قالاسىندا گۇلميرا ساتىبالدى ءىسى بويىنشا الدىن الا تىڭداۋ باستالدى، دەپ جازادى "ادىرنا" ۇلتتىق پورتالى.
Informburo.kz حابارلاۋىنشا، گۇلميرا ساتىبالدىعا وزىنشە بيلىك ەتۋ مەن ادام ۇرلادى دەگەن ايىپ تاعىلعان. سونىمەن قاتار، ىستە ونىڭ جۇرگىزۋشىسى ءمادي باتىرشاەۆ پەن راشيد وتەبەكوۆ تە ايىپتالۋشى رەتىندە تانىلعان.
الدىن الا تىڭداۋ بارىسىندا گۇلميرا ساتىبالدىنىڭ ادۆوكاتتارى سوتتالۋشىعا قاتىستى بارلىق قىلمىستىق ءىستى بىرىكتىرۋدى جانە بۇلتارتپاۋ شاراسىن ۇيقاماققا وزگەرتۋدى سۇرادى.
"گۇلميرا ساتىبالدىنىڭ قاماۋعا الىنعانىنا ءبىر جىلدان استى. ونىڭ ءۇش بالاسى، بەس نەمەرەسى بار. ول ايەل، وعان قاماۋدا وتىرۋ قيىن. گۇلميرا ساتىبالدىنىڭ مىنەزى وڭ سيپاتتالادى، تۇراقتى تۇرعىلىقتى جەرى بار. ول الدىن الا شاقىرتۋ بويىنشا بارلىق سوت وتىرىسىنا قاتىسۋعا دايىن، سوندىقتان بۇلتارتپاۋ شاراسىن ۇيقاماققا نەمەسە كەپىلگە اۋىستىرۋدى سۇرايمىز", – دەدى ادۆوكات اسەل راباتوۆا.
الايدا پروكۋرور الميرا قوجاحمەتوۆا بۇلتارتپاۋ شاراسىن وزگەرتۋگە قارسىلىق تانىتتى. ونىڭ ايتۋىنشا، گۇلميرا ساتىبالدى سوتقا دەيىنگى ءىس جۇرگىزۋ كەزىندە ەلدەن كەتىپ قالماق بولعان.
"بۇلتارتپاۋ شاراسى نەگىزدەر بولعان جاعدايدا وزگەرتىلۋى مۇمكىن. قازىرگى ۋاقىتتا مۇنداي نەگىزدەر انىقتالعان جوق، ويتكەنى سوتقا دەيىنگى ءىس جۇرگىزۋ بارىسىندا سوتتالۋشى گۇلميرا ساتىبىلدىنىڭ شەكارانى كەسىپ وتپەك بولعان فاكتىلەرى بولعان. سوندىقتان بۇلتارتپاۋ شاراسىن وزگەرتۋگە بولمايدى دەپ ەسەپتەيمىن", – دەدى پروكۋرور.
الدىن الا تىڭداۋ وتىرىسىنىڭ شەشىمى بۇگىن، 9 ناۋرىزدا بەلگىلى بولادى.
ەسكە سالايىق، 2022 جىلدىڭ ناۋرىز ايىندا سىبايلاس جەمقورلىققا قارسى قىزمەت قايرات ساتىبالدىۇلى مەن ونىڭ بۇرىنعى ايەلى گۇلميرا ساتىبالدىعا جانە باسقا دا تۇلعالارعا قاتىستى بيزنەستى رەيدەرلىك باسىپ الۋ فاكتىسى بويىنشا سوتقا دەيىنگى تەرگەۋدى باستاعان ەدى. سول جىلى 16 ناۋرىزدا گۇلميرا ساتىبالدى قىلمىستىق پروتسەسسۋالدىق كودەكستىڭ 128-بابى بويىنشا ۇستالىپ، استانا قالاسىنىڭ ۋاقىتشا ۇستاۋ يزولياتورىنا قامالعان بولاتىن.
"ادىرنا" ۇلتتىق پورتالى
