8 اقپاندا اقتوبە، الماتى مەن قىزىلوردا قالالارىندا ونداعان ادام بيلىككە بالاعا تولەنەتىن جاردەماقىنى كوبەيتۋ، كوپ بالالى وتباسىلاردى باسپانامەن قامتاماسىز ەتۋ جانە وزگە الەۋمەتتىك پروبلەمالاردى شەشۋدى تالاپ ەتىپ باردى.
اقتوبەدە قالا اكىمدىگىنە بارعان ادامداردى اكىمدىكتىڭ جاۋاپتى قىزمەتكەرلەرى قابىلدادى.
— ءار بالاعا ايىنا 20 مىڭ تەڭگەدەن جاردەماقى تولەنسىن، باستاۋىش سىنىپ وقۋشىلارىن تەگىن تاماقپەن جانە قوعامدىق كولىكتە تەگىن ءجۇرۋىن قامتاماسىز ەتسىن، ءۇش جانە ودان كوپ بالاسى بارلارعا باسپانا بەرىلسىن، از قامتىلعان وتباسىلارىنىڭ نەسيەلەرى كەشىرىلسىن، ەڭبەك جانە حالىقتى الەۋمەتتىك قورعاۋ ءمينيسترى ءمادينا ابىلقاسىموۆا قىزمەتىنەن كەتسىن دەگەن تالاپتار قويدىق، — دەدى اكىمدىكتەگى كەزدەسۋگە قاتىسقان قالا تۇرعىنى ءلاززات جۇماعاليەۆا.
كوپ بالالى انا جانىمكۇل بيجانوۆانىڭ سوزىنشە، ولارمەن كەزدەسكەن شەنەۋنىكتەر ارىز-وتىنىشتەرى بويىنشا جۇمىس ناتەجەسىن ون كۇننەن كەيىن حابارلايتىندارىن ايتقان.
جۇما كۇنى قىزىلوردا قالاسىنداعى جۇمىسپەن قامتۋ ورتالىعىنا كەلگەن ونداعان كوپ بالالى انا مەملەكەتتەن بەرىلەتىن الەۋمەتتىك جاردەماقىنىڭ دۇرىس بولىنبەي وتىرعانىن ايتىپ، نارازىلىق ءبىلدىردى. ولار جاردەماقى تولەيتىن ورگان وزدەرىنەن تىركەۋگە تۇرۋدى تالاپ ەتەتىنىن، بىراق جەكە باسپاناسى جوق بولعاندىقتان تىركەۋگە تۇرۋ ماشاقاتقا اينالعانىن ايتادى.
— بالاڭىزعا [جاردەماقى] الاسىز، زەينەتاقى الادى ەكەنسىز، ەنەڭىز زەينەتاقى الادى ەكەن دەيدى. حالىق قاي جاققا بارىپ جۇمىس تابادى؟ قىزىلوردالىقتار قۇلدىقتا ءجۇر. 37-40 مىڭ تەڭگە الادى، ەڭ جوعارعى ايلىق — 50 مىڭ تەڭگە. ءبىر جانۇيادان ءتورت-بەس بالادان بار، — دەيدى كوپ بالالى انا زيناگۇل بازىلبەكوۆا.
نارازى انالارعا جولىققان قىزىلوردا قالاسى اكىمنىڭ ورىنباسارى مەن «نۇر وتان» پارتياسىنىڭ وكىلى ءار ادامنىڭ ماسەلەسىن جەكە شەشۋگە ۋادە بەردى.
الماتى شەنەۋنىكتەر جەرگىلىكتى بيلىككە تالاپپەن كەلگەن انالارعا ارىز-ءوتىنىشىن تىڭداۋ ءۇشىن قالالىق جۇمىسپەن قامتۋ جانە الەۋمەتتىك باعدارلامالار باسقارماسى ىشىنە كىرۋدى ۇسىندى. كەزدەسۋگە ازاتتىق جۋرناليستەرى كىرگىزىلمەيتىنىن ايتقان شەنەۋنىكتىڭ سوزىنە سول جەرگە جينالعانداردىڭ كەيبىرى نارازىلىق ءبىلدىردى.
كەيىن ءمالىم بولعانىنداي، نارازى انالارمەن الماتى اكىمىنىڭ ورىنباسارى ەرلان اۋكەنوۆ كەزدەسىپ، بيلىك ولاردىڭ ارىز-وتىنىشتەرىنە ەكى اپتادان كەيىن جاۋاپ بەرەتىنىن ايتقان.
4 اقپانعا قاراعان ءتۇنى استانانىڭ كوكتال-1 شاعىن اۋدانىندا جەكە ءۇيدىڭ اۋلاسىنداعى ۋاقىتشا باسپانا ورتەنىپ، ءبىر وتباسىنداعى 2006, 2008, 2013, 2015 جانە 2018 جىلى تۋعان بەس قىز بالا وپات بولعان ەدى. جەرگىلىكتى بيلىكتىڭ دەرەگىنشە، كوپ بالالى وتباسى تۇرىپ جاتقان باسپانادا ءورت شىققاندا بالالاردىڭ اتا-اناسى جۇمىستا بولعان.
بۇل حابار الەۋمەتتىك جەلىدە قىزۋ تالقىلاندى. بيلىكتى سىناعان پىكىرلەردىڭ اراسىندا ەڭبەك جانە الەۋمەتتىك قورعاۋ ءمينيسترى ءمادينا ابىلقاسىموۆا قىزمەتتەن كەتسىن دەگەن تالاپ تا ايتىلدى. 6 اقپاندا استانانىڭ ورتالىعىنداعى كونتسەرت زالىنا جينالعان ونداعان انا بەس بالاسى ورتتەن مەرت بولعان وتباسىنداعىداي جاعداي ءوز باستارىنا دا بارىن ايتىپ، بيلىكتەن الەۋمەتتىك پروبلەمالارىن شەشۋدى تالاپ ەتتى. الماتى، اقتوبە مەن شىمكەنتتە دە تۇرعىندار بيلىككە وسىنداي تالاپپەن باردى.
سارسەنبى كۇنى قازاقستان ۇكىمەتى ەل ازاماتتارىنىڭ تابىسىن ارتتىرۋ جانە تۇرمىس ساپاسىن جاقسارتۋ، كوپبالالى وتباسىلارعا قولداۋ شارالارىن كۇشەيتۋ جونىندەگى جۇمىس توبى قۇرىلعانىن حابارلادى. يندۋستريا جانە ينفراقۇرىلىمدىق دامۋ ءمينيسترى جەڭىس قاسىمبەك ءۇيى جوق كوپ بالالى وتباسىلارعا پاتەر سالۋعا قارجى ىزدەستىرىلىپ جاتقانىن ايتتى.
