ءبىر وقپەن ءۇش قويان

2535
Adyrna.kz Telegram

ارايى اسپاننان توگىلگەن، اق قارعا ورانعان اقپان ايىنىڭ اياعىندا "ۇرپاق جادىنداعى ۇلتتىق مۇرا" اتتى ءدۇبىرلى دودانىڭ ءوتۋى اباي اتىنداعى مەكتەپ-ينتەرناتىنا بۇيىرىپتى. بۇل سايىستا ءبىرتۋار تۇلعا زەينوللا سانىكتىڭ ءومىر بايانى مەن ەڭبەكتەرى قامتىلدى. وقۋشىلار كيىز ءۇيدىڭ باستان-اياق قۇرىلۋىن جاتتاپ، ساحنادا ساسپاي سايرادى. مەنىڭ دە مۇنداي مول مۇراعا تولى بايگەدە باعىمدى سىناعىم كەلىپ ەدى. بىراق، اقىماقتىعىم ۇستاپ باس تارتتىم. نەگە دەيسىز عوي؟ الامانعا ءبىر كۇن قالعاندا دايىندالىپ، وزىمە-ءوزىم سەنىمسىز كۇيگە ءتۇستىم.

جارىستىڭ باستالۋىنا جارتى ساعات قالعاندا ۇستازىم جارقىن سالەنۇلىنا: اعاي، مەن بۇگىن سايىسقا قاتىسپاۋدى ءجون كوردىم. سەبەبى، دايىندىعىم ءو-وتە ءالسىز. وداندا بالالاردىڭ شابىسىن تاماشالاپ، مارجان سوزدەردى ءتىزىپ تۇرىپ ماقالا جازايىنشى. جاراي ما؟ "—دەدىم. سوندا جارقىن سالەنۇلى: ماقۇل. قالاۋىڭ ءبىلسىن. بىراق، ويلا-ان. بابىڭ ەمەس، باعىڭ شاۋىپ كەتۋى مۇمكىن"— دەپ بالانۇيرەك ساۋساعىن شوشايتتى.

سايىس باستالدى. جەرەبە تارتىلدى. بالالار بىرىنەن سوڭ ءبىرى شىعىپ جاتىر. قازىلار ىنتالى جاستارعا سۇراقتارىن قارشا بوراتۋدا. وقۋشىلار دا تايسالار ەمەس. بىلگەنىن جانتالاسا ايتىپ، بىلمەگەنىنىڭ جاۋاپتارىن ەسكەرىپ تۇردى. سۇراقتاردىڭ الپىس پايىزى مەن بىلەتىندەر ەكەن. ىشتەي:" "اتتەگەن-اي، قاتىسۋىم كەرەك ەدى عوي" — دەپ وكىنگەنىم وتىرىك ەمەس. ونىڭ نەسىن جاسىرايىن؟ كيىز ءۇيدىڭ سۇيەگى، تۋىلدىرىعى، تۇندىگى ت.ب دۇنيەلەرى تۋرالى بىلەتىنمىن. بىراق، وقىپ، جاتتاپ ۇلگەرمەگەن سۇراقتاردى ەستىگەندە، "ۋحح، مىنانى ماعان قويعاندا نە بولار ەدى؟ ءبىر ورىندا قاتقان قارا تاستاي ءۇن ءتۇنسىز تۇرسام.. ماسقارا.. قاتىسپاعانىم دۇرىس بوپتى" دەدىم. وسى ءبىر ساتتەردە ويىم سان-ساققا جۇگىرىپ جاتتى: " سوندا مەنىڭ بۇل ءىس-ارەكەتتەرىم اقشا مەن اتاققۇمارلىق ءۇشىن بە؟ جو-وق ءشامىل، سەن بۇل جارىسقا ۇلتتىق مۇرانى ۇلىقتاعان ۇلانداردى تىڭداۋعا كەلدىڭ. سونى ءبىل. " — دەپ ءوزىمدى-ءوزىم تۇزەپ الىپ، ارى قاراي بالالاردىڭ دابىسىنا قۇلاق ءتۇردىم.

زەينوللا سانىكتىڭ ءومىر-بايانىن، جازعان ناقىلدارىن ەستىگەنمەن قوسا سان-الۋان ەڭبەكتەرىمەن تانىستىق. ءوزىم دە الەۋمەتتىك جەلىگە كىرىپ، تىڭ مالىمەتتەردى اقتارا باستادىم. ول كىسىنىڭ ءتۇرلى تاۋقىمەتكە تولى عۇمىرى وقىرماندى قىزىقتىرماي قويماسى انىق. ءبىز ۇمىتىپ جاتقان، بابالاردىڭ ويلاپ تاپقان كيىز ءۇيىنىڭ قىر-سىرىن دارىپتەۋدى وشپەيتىن ەرلىك دەپ بىلەمىن. سوندىقتان زەينوللا سانىكتى تەك كورنەكتى جازۋشى دەپ قاراستىرماي، زەردەلى زەرتتەۋشى دەسەكتە ارتىق بولماس. مەنىڭشە زەينوللا سانىك تامىرى تەرەڭگە جايىلعان بايشىنار ىسپەتتەس. ال، مىنا ەڭبەكتەرىن ەش ەتپەي، كوز مايىن تاۋىسىپ وقىپ، جاتتاعان جالىندى جاستار بايشىناردىڭ بۇتاقتارى سياقتى كورىندى ماعان.

جارىس ۋاقىتى اياعىنا تاقادى. قازىلار وقۋشىلاردىڭ العان ورىندارىن ءادىل باعالاۋعا اتتاندى. ءماجىلىس زالى تىم-تىرىس. اقىن جىگىتتەر بولىپ، جيىلعان كورەرمەندى ورگەن ولەڭدەرىمىزبەن ءتانتى ەتەيىك دەپ شەشتىك. سەيتجانۇلى ەراسىل "كۇشان" اتتى شىتىرمان ۋاقيعاعا تولى ولەڭىن وقىسا، جالعاس سەرىكبولۇلى "كوپ ولەڭ" دەگەن قاراكوز قارىنداسىنا ارناعان جۇرەكجاردى جىرىن جاتقا ايتتى. ال مەن ءوز سىنىبىمنىڭ سانقويلارىنا جازعان ادەمى تارماقتارىمدى قىزدارعا قاراپ قايىرىپ، ءبىر مارقايتتىم.

بالالار بۇيىرعان جۇلدەلەرىمەن ماراپاتتالدى. باس جۇلدە(50 000تگ) 9-سىنىپ وقۋشىسى بالاۋسا مەدەتقىزىنا بۇيىردى. 1-ورىندى(40 000تگ) 11-سىنىپتا وقيتىن جالعاس سەرىكبولۇلى جەڭىپ الدى. ال 2-ورىنعا(30 000تگ) 2 وقۋشى، 3-ورىنعا(20 000تگ) 2 وقۋشى قول جەتكىزىپ، مەرەيلەرى ۇستەم بولدى. بۇل جولعى زياتكەرلىك بايقاۋعا "زەينوللا سانىك اتىنداعى مادەنيەت قورى" دەمەۋشى بولدى. اباي اتىنداعى رممي-ءدىڭ قولداۋىمەن ء"دىلمار" شەشەندىك ونەر ۇيىرمەسى ۇيىتقى بولىپ وتكىزدى. قوردىڭ اتقارۋشى ديرەكتورى اقىن، ۇستاز، باسپاگەر سەرىك قاليەۆ جانە باسقا ماماندار قازىلىق ەتتى.

ءىس-شارادان سوڭ بارلىعى كەزەكتەسە سۋرەتكە ءتۇسىپ جاتىر. مەن مەكتەبىمىزدىڭ ايتىسكەرلەرىن باپتايتىن ازۋلى اقىن سەرىك قاليەۆ اكىرامۇلىنان كوز الماي تۇرمىن. سەبەبى، سوڭعى كۇندەرى ايتىسقا دەگەن قىزىعۋشىلىعىم ويانىپ جۇرگەن بولاتىن. تەجەلمەي باردىم دا، سالەمدەسىپ، نيەتىمنىڭ بار ەكەندىگىن ايتتىم. سەرىك اعاي ماقۇلدادى.

مىنە، الاماندا الىسىپ، قانجىعاما جۇلدە بايلاماسام دا، ايتىس ۇيىرمەسىنە قوسىلۋ مەن ءۇشىن ۇلكەن ولجا بولدى. كورەرمەن رەتىندە جارىستا سوڭىنا شەيىن تاماشالاۋمەن وتكىزسەم دە، ءبىر وقپەن ەكى ەمەس، ءۇش قويان اتتىم. اۋەلى كيىز ۇيمەن تولىققاندى تانىستىم. ەكىنشى زەينوللا سانىكتى زەرتتەۋگە دەگەن ماحابباتىم اشىلدى. ءۇشىنشى ايتىسقا قوسىلدىم. وسىلايشا جاقسىلىققا تولى جايدارلى كۇن مارەسىنە جەتتى.

ءشامىل تيمۋرلانۇلى،

ء"دىلمار" ۇيىرمەسىنىڭ مۇشەسى

(اباي اتىنداعى رممي-ءدىڭ 10-سىنىپ وقۋشىسى)

پىكىرلەر