Araıy aspannan tógilgen, aq qarǵa oranǵan aqpan aıynyń aıaǵynda "Urpaq jadyndaǵy ulttyq mura" atty dúbirli dodanyń ótýi Abaı atyndaǵy mektep-ınternatyna buıyrypty. Bul saıysta birtýar tulǵa Zeınolla Sániktiń ómir baıany men eńbekteri qamtyldy. Oqýshylar kıiz úıdiń bastan-aıaq qurylýyn jattap, sahnada saspaı saırady. Meniń de mundaı mol muraǵa toly báıgede baǵymdy synaǵym kelip edi. Biraq, aqymaqtyǵym ustap bas tarttym. Nege deısiz ǵoı? Alamanǵa bir kún qalǵanda daıyndalyp, ózime-ózim senimsiz kúıge tústim.
Jarystyń bastalýyna jarty saǵat qalǵanda ustazym Jarqyn Sálenulyna: Aǵaı, men búgin saıysqa qatyspaýdy jón kórdim. Sebebi, daıyndyǵym ó-óte álsiz. Odanda balalardyń shabysyn tamashalap, marjan sózderdi tizip turyp maqala jazaıynshy. Jaraı ma? "—dedim. Sonda Jarqyn Sálenuly: Maqul. Qalaýyń bilsin. Biraq, oıla-an. Babyń emes, baǵyń shaýyp ketýi múmkin"— dep balanúırek saýsaǵyn shoshaıtty.
Saıys bastaldy. Jerebe tartyldy. Balalar birinen soń biri shyǵyp jatyr. Qazylar yntaly jastarǵa suraqtaryn qarsha boratýda. Oqýshylar da taısalar emes. Bilgenin jantalasa aıtyp, bilmegeniniń jaýaptaryn eskerip turdy. Suraqtardyń alpys paıyzy men biletinder eken. Ishteı:" "Áttegen-aı, qatysýym kerek edi ǵoı" — dep ókingenim ótirik emes. Onyń nesin jasyraıyn? Kıiz úıdiń súıegi, týyldyryǵy, túndigi t.b dúnıeleri týraly biletinmin. Biraq, oqyp, jattap úlgermegen suraqtardy estigende, "Ýhh, mynany maǵan qoıǵanda ne bolar edi? Bir orynda qatqan qara tastaı ún túnsiz tursam.. Masqara.. Qatyspaǵanym durys bopty" dedim. Osy bir sátterde oıym san-saqqa júgirip jatty: " Sonda meniń bul is-áreketterim aqsha men ataqqumarlyq úshin be? Jo-oq Shámil, sen bul jarysqa ulttyq murany ulyqtaǵan ulandardy tyńdaýǵa keldiń. Sony bil. " — dep ózimdi-ózim túzep alyp, ary qaraı balalardyń dabysyna qulaq túrdim.
Zeınolla Sániktiń ómir-baıanyn, jazǵan naqyldaryn estigenmen qosa san-alýan eńbekterimen tanystyq. Ózim de áleýmettik jelige kirip, tyń málimetterdi aqtara bastadym. Ol kisiniń túrli taýqymetke toly ǵumyry oqyrmandy qyzyqtyrmaı qoımasy anyq. Biz umytyp jatqan, babalardyń oılap tapqan kıiz úıiniń qyr-syryn dáripteýdi óshpeıtin erlik dep bilemin. Sondyqtan Zeınolla Sánikti tek kórnekti jazýshy dep qarastyrmaı, zerdeli zertteýshi desekte artyq bolmas. Menińshe Zeınolla Sánik tamyry tereńge jaıylǵan baıshynar ispettes. Al, myna eńbekterin esh etpeı, kóz maıyn taýysyp oqyp, jattaǵan jalyndy jastar baıshynardyń butaqtary sııaqty kórindi maǵan.
Jarys ýaqyty aıaǵyna taqady. Qazylar oqýshylardyń alǵan oryndaryn ádil baǵalaýǵa attandy. Májilis zaly tym-tyrys. Aqyn jigitter bolyp, jıylǵan kórermendi órgen óleńderimizben tánti eteıik dep sheshtik. Seıtjanuly Erasyl "Kúshán" atty shytyrman ýaqıǵaǵa toly óleńin oqysa, Jalǵas Serikboluly "Kóp óleń" degen qarakóz qaryndasyna arnaǵan júrekjardy jyryn jatqa aıtty. Al men óz synybymnyń sánqoılaryna jazǵan ádemi tarmaqtarymdy qyzdarǵa qarap qaıyryp, bir marqaıttym.
Balalar buıyrǵan júldelerimen marapattaldy. Bas júlde(50 000tg) 9-synyp oqýshysy Balaýsa Medetqyzyna buıyrdy. 1-oryndy(40 000tg) 11-synypta oqıtyn Jalǵas Serikboluly jeńip aldy. Al 2-orynǵa(30 000tg) 2 oqýshy, 3-orynǵa(20 000tg) 2 oqýshy qol jetkizip, mereıleri ústem boldy. Bul jolǵy zııatkerlik baıqaýǵa "Zeınolla Sánik atyndaǵy mádenıet qory" demeýshi boldy. Abaı atyndaǵy RMMI-diń qoldaýymen "Dilmar" sheshendik óner úıirmesi uıytqy bolyp ótkizdi. Qordyń atqarýshy dırektory aqyn, ustaz, baspager Serik Qalıev jáne basqa mamandar qazylyq etti.
Is-sharadan soń barlyǵy kezektese sýretke túsip jatyr. Men mektebimizdiń aıtyskerlerin baptaıtyn azýly aqyn Serik Qalıev Ákiramulynan kóz almaı turmyn. Sebebi, sońǵy kúnderi aıtysqa degen qyzyǵýshylyǵym oıanyp júrgen bolatyn. Tejelmeı bardym da, sálemdesip, nıetimniń bar ekendigin aıttym. Serik aǵaı maquldady.
Mine, alamanda alysyp, qanjyǵama júlde baılamasam da, aıtys úıirmesine qosylý men úshin úlken olja boldy. Kórermen retinde jarysta sońyna sheıin tamashalaýmen ótkizsem de, bir oqpen eki emes, úsh qoıan attym. Áýeli kıiz úımen tolyqqandy tanystym. Ekinshi Zeınolla Sánikti zertteýge degen mahabbatym ashyldy. Úshinshi aıtysqa qosyldym. Osylaısha jaqsylyqqa toly jaıdarly kún máresine jetti.
Shámil Tımýrlanuly,
"Dilmar" úıirmesiniń múshesi
(Abaı atyndaǵy RMMI-diń 10-synyp oqýshysy)
