1997 جىلى گۋامنىڭ اۋەجايىنا جەتە بەرگەندە Korean Air-ءدىڭ ۇشاعى اپات بولدى. 223 ادام جان تاپسىرادى.
1990 جىلى كولۋمبيانىڭ Avianca اۋەكومپانياسىنىڭ وتىنى تاۋسىلىپ قالىپ، نيۋ يوركتىڭ جانىنا قۇلادى. 73 ادام كوز جۇمدى.
بۇل اۋە اپاتتارىنا كوپتەگەن سەبەپ بار. بىراق سولاردىڭ ىشىندە ەڭ ماڭىزدىسى - مادەني سەبەپ بولىپ شىقتى.
عالىمداردىڭ ايتۋىنشا، كەيبىر ەلدەردە ۇلكەن ادامنىڭ (ماسەلەن، قىزمەتى، ابىرويى جوعارى) شەشىمىنە كۇمان كەلتىرۋ - دۇرىس مادەني نورما ەمەس.
ۇشاقتاعى ەكى ۇشقىشتىڭ ءبىرى - كاپيتان. ەكى جاعدايدا دا ەكىنشى ۇشقىش كاپيتاننىڭ قاتەلىگىن دەر كەزىندە ەسكەرتپەگەن، ءتىپتى ەسكەرتۋگە يمەنگەن بولىپ شىقتى.
كەشە رەسەيدىڭ ۋكرايناعا سوعىس اشقانىنا ءبىر جىل تولدى.
جۋىردا ساراپتامالىق ماتەريال جاريالاندى. پۋتين ۋكراينانى باسىپ الام دەپ شەشىم شىعاراردا توڭىرەگى وعان شىندىقتى ايتۋعا يمەنگەن ەكەن، ونىڭ ەستىگىسى كەلگەنىن عانا ايتىپ وتىرعان. سەبەبى كاپيتاننىڭ پايىمىن جوققا شىعارۋعا قورقادى. “قازىرگى رەسەيدىڭ ءالسىز تۇسى وسى”، - دەيدى ساراپشىلار. نەگە ولاي؟ ويتكەنى پۋتين ءوزى ۇستانعان ساياساتقا كۇمان كەلتىرگەندەردى الاستاتىپ، تەك قانا قولداپ-قۋاتتايتىنداردى عانا جانىنا جۋىستىرىپ وتىرعان ەكەن.
كاپيتانعا ۇشاق پەن ۇشۋ بارىسى تۋرالى اقيقات ايتىلماعان سوڭ، ۇشاقتار اپاتقا ۇشىرايدى ەكەن. مەملەكەتتەر دە ۇشاقتار سەكىلدى، كاپيتانعا شىندىقتى ايتاتىن ادام قالماسا، ۇلتتار دا ۇزاق ۇشا المايدى.
شىڭعىس مۇقان
