پرەزيدەنت سايلاۋىنا ءوتىنىش قابىلداۋ اياقتالدى

2357
Adyrna.kz Telegram

ۋكراينا ورتالىق سايلاۋ كوميسسياسى 31 ناۋرىزدا وتەتىن پرەزيدەنت سايلاۋىنا تۇسۋگە نيەت بىلدىرگەندەردىڭ قۇجاتىن قابىلداۋدى اياقتادى. وسى سايلاۋعا قاتىسۋعا ءوتىنش بەرگەندەردىڭ سانى 83 ادامعا جەتكەن.

ۋكراينا ورتالىق سايلاۋ كوميسسياسى 4 اقپاندا سايلاۋعا قاتىسۋعا تىلەك بىلدىرگەن 28 ادامنىڭ ءوتىنىشى ماقۇلداۋدان وتكەنىن، 22 ءوتىنىشتىڭ قابىلدانباعانىن، ال 33 ءوتىنىش قاراستىرىلىپ جاتقانىن حابارلاعان. تىركەلگەن كانديداتتار ءتىزىمىن 9 اقپانعا دەيىن جاريالاۋ كوزدەلىپ وتىر.

سايلاۋعا قاتىساتىنداردىڭ نوبايىنا قاراعاندا نەگىزگى باسەكە قازىرگى پرەزيدەنت پەتر پوروشەنكو مەن بۇرىنعى پرەمەر-مينيستر يۋليا تيموشەنكو اراسىندا ورىستەيتىن سياقتى. جاريالانعان الەۋمەتتىك زەرتتەۋ ناتيجەسىنە قاراعاندا وزگەلەرگە قاراعاندا تيموشەنكونى قولداۋشىلار سانى كوپ ەكەنى بايقالعان.

ۋكراينا پرەزيدەنتى پەتر پوروشەنكو مەن ۋكراينا پراۆوسلاۆ شىركەۋىنىڭ ءميتروپوليتى ەپيفاني. كيەۆ. 3 اقپان 2019 جىل
ۋكراينا پرەزيدەنتى پەتر پوروشەنكو مەن ۋكراينا پراۆوسلاۆ شىركەۋىنىڭ ءميتروپوليتى ەپيفاني. كيەۆ. 3 اقپان 2019 جىل

53 جاستاعى پەتر پوروشەنكو ءوزىنىڭ پرەزيدەنت سايلاۋىنا قاتىساتىنىن 29 قاڭتاردا جاريالاعان. ول ەگەر جەڭسە، ءوزىنىڭ ەكىنشى بەس جىلدىق پرەزيدەنتتىگى كەزىندە ۋكراينانى ەۋروداق پەن ناتو-عا مۇشەلىككە قابىلداۋعا كۇش سالاتىنىن ايتقان.

ەلدەگى باي ادامداردىڭ ءبىرى بولىپ كەلەتىن پوروشەنكو 2014 جىلعى "ەۋرومايدان" نارازىلىقتارى كەزىندە بيلىككە كەلگەن بولاتىن. نارازىلىق ناتيجەسىندە ماسكەۋگە بۇيرەگى بۇراتىن سول كەزدەگى پرەزيدەنت ۆيكتور يانۋكوۆيچ بيلىكتەن كەتكەنى بەلگىلى.

پەتر پوروشەنكو - باتىسپەن ارادا تىعىز ينتەگراتسيا جايىن اشىق كوتەرىپ، رەسەيدىڭ قىرىمدى اننەكسيالاپ العانىن جانە ماسكەۋدىڭ شىعىس ۋكرايناداعى سەپەراتيستەردى قولداۋىن وتكىر سىناعان ساياساتكەر. ماسكەۋ بولسا، ۋكراينا شىعىسىنداعى اسكەري قۇزىرىن جوققا شىعارۋمەن كەلەدى.

الايدا پوروشەنكونى سىناۋشىلاردىڭ ايتۋىنشا، ول جەمقورلىقتى جەڭە الماي كەلەدى. ۋكراينا پرەزيدەنتى بيىل جەمقورلىق ىستەرىن قارايتىن ارنايى سوت قۇرۋعا ۋادە دە بەرگەن. باتىس ەلدەرىنىڭ باسشىلارى دا كوررۋپتسيانى ۋكراينانىڭ قاۋىپسىزدىگى مەن دامۋى ءۇشىن ۇلكەن كەدەرگى رەتىندە تانيدى.

پوروشەنكو قازىرگە دەيىن ۋكراينا پراۆوسلاۆ شىركەۋىن رەسەيدەن تاۋەلسىز ەتۋگە قول جەتكىزدى. كوپتەگەن ساراپشىلار ونىڭ بۇل ارەكەتىن پوروشەنكونىڭ السىرەپ بارا جاتقان قوعامدىق قولداۋىنا سەپ بولادى دەپ ەسەپتەيدى.

58 جاستاعى يۋليا تيموشەنكو ءوزىنىڭ سايلاۋعا قاتىساتىنىن پوروشەنكودان بۇرىن، 22 قاڭتاردا جاريالاعان. ول 2004 جىلعى رەۆوليۋيۋتسيانىڭ جەتەكشىلەرىنىڭ ءبىرى بولعان. الايدا 2014 جىلعى پرەزيدەنت سايلاۋىندا يۋليا تيموشەنكو قازىرگى پرەزيدەنت پەتر پوروشەنكودان ۇتىلىپ قالعان.

ۋكراينانىڭ وپپوزيتسيالىق ساياساتكەرى يۋليا تيموشەنكو «باتكيۆششينا» پارتياسىنىڭ قۇرىلتايىندا سويلەپ تۇر. كيەۆ. 22 قاڭتار، 2019 جىل
ۋكراينانىڭ وپپوزيتسيالىق ساياساتكەرى يۋليا تيموشەنكو «باتكيۆششينا» پارتياسىنىڭ قۇرىلتايىندا سويلەپ تۇر. كيەۆ. 22 قاڭتار، 2019 جىل

تيموشەنكو دا ءوزىن ۋكراينانىڭ ناتو-مەن جانەە ەۋروداقپەن جاقىن قاتىناستا بولۋىن جاقتايتىن ساياساتكەر رەتىندە كورسەتىپ ءجۇر. ول ەلدىڭ شىعىسىنداعى رەسەيشىل جىكشىلدەرمەن كۇرەستى قولدايتىندىعىن بىلدىرگەن.

ۋكراينا پرەزيدەنتتىگىنە تۇسۋگە تىلەك بىلدىرگەندەردىڭ ءبىرى - شوۋمەن، اكتەر ۆلاديمير زەلەنسكي. ورتالىق سايلاۋ كوميسسياسى بۇعان قوسا ەلدىڭ بۇرىنعى ۆيتسە-پرەمەرى يۋري بويكونىڭ دا ءوتىنىشىن تىركەگەنى بەلگىلى بولعان.

"ازاتتىق" راديوسى

پىكىرلەر