قر ورتالىق سايلاۋ كوميسسياسىنىڭ وكىلدەرى بريفينگتە كانديداتتىڭ سايلاۋدا تولەگەن سايلاۋ جارناسى قاي جاعدايدا قايتارىلاتىنىن جانە ونىڭ قاي جاعدايدا مەملەكەت كىرىسىنە اينالدىرىلاتىنىن ءتۇسىندىردى، دەپ جازادى "ادىرنا" ۇلتتىق پورتالى.
وسك مۇشەسى ءسابيلا مۇستافينانىڭ ايتۋىنشا، كانديداتقا نەمەسە پارتياعا سايلاۋ جارناسىن قايتارۋ جاعدايلارى "قازاقستان رەسپۋبليكاسىنداعى سايلاۋ تۋرالى" كونستيتۋتسيالىق زاڭدا جازىلعان.
"سايلاۋ جارنالارى ءۇش جاعدايدا قايتارىلادى. ءبىرىنشىسى – ەگەر كانديدات دەپۋتات بولىپ سايلانسا. ەكىنشىسى – كانديدات نەمەسە ساياسي پارتيا داۋىس بەرۋگە قاتىسقان سايلاۋشىلار سانىنىڭ كەمىندە 5 پايىز داۋىسىن جيناسا. ۇشىنشىدەن، وكىنىشكە قاراي، مۇنداي جاعدايلار دا كەزدەسەدى، سوندىقتان ول زاڭنامادا بەلگىلەنگەن: كانديدات نەمەسە ساياسي پارتيانىڭ پارتيالىق تىزىمىنە ەنگىزىلگەن جالعىز كانديدات قايتىس بولعان جاعدايدا، جارنا قايتارىلادى", - دەدى وسك مۇشەسى ءسابيلا مۇستافينا.
ول قالعان جاعدايلاردا سايلاۋ جارناسى رەسپۋبليكالىق بيۋدجەتكە تۇسەتىنىن ايتتى.
"ادىرنا" ۇلتتىق پورتالى
