2022 جىلى مۇگەدەك جانە اسىراۋشىسىنان ايىرىلعاندارعا 440 ملرد تەڭگە جاردەماقى تولەنگەن

2014
Adyrna.kz Telegram

2022 جىلى 440 ملرد تەڭگەدەن استام سوماعا قازاقستاندىقتارعا مۇگەدەكتىك جانە اسىراۋشىسىنان ايىرىلۋ بويىنشا جاردەماقى تولەندى. بۇل تۋرالى قر ەڭبەك جانە حالىقتى الەۋمەتتىك قورعاۋ مينيسترلىگىنىڭ ءباسپاسوز قىزمەتى جاريالادى، دەپ حابارلايدى “ادىرنا” ءتىلشىسى.

2022 جىلدىڭ قاڭتار-جەلتوقسان ايلارى ارالىعىندا رەسپۋبليكالىق بيۋدجەتتەن مۇگەدەكتىگى بويىنشا مەملەكەتتىك الەۋمەتتىك جاردەماقى تولەۋگە 341 ملرد-تان استام تەڭگە، اسىراۋشىسىنان ايىرىلۋ جاعدايى بويىنشا – 99,9 ملرد تەڭگە جۇمسالدى.

2023 جىلعى 1 قاڭتارداعى جاعداي بويىنشا مۇگەدەكتىگى بويىنشا مەملەكەتتىك الەۋمەتتىك جاردەماقى الۋشىلاردىڭ سانى شامامەن 538,6 مىڭ ادام، ال اسىراۋشىسىنان ايىرىلۋ جاعدايى بويىنشا – شامامەن 189,9 مىڭ ادام بولدى.

مۇگەدەكتىگى بويىنشا مەملەكەتتىك الەۋمەتتىك جاردەماقىلاردىڭ مولشەرى مۇگەدەكتىكتىڭ توبىنا جانە سەبەبىنە، سونداي-اق ءتيىستى قارجى جىلىنا ارنالعان «رەسپۋبليكالىق بيۋدجەت تۋرالى» زاڭدا بەلگىلەنگەن ەڭ تومەنگى كۇنكورىس دەڭگەيىنىڭ شاماسىنا بايلانىستى بولادى.

اسىراۋشىسىنان ايىرىلۋ جاعدايى بويىنشا مەملەكەتتىك الەۋمەتتىك جاردەماقىنىڭ مولشەرى قايتىس بولعان (قازا تاپقان) اسىراۋشىنىڭ اسىراۋىنداعى ادامداردىڭ سانىنا، قايتىس بولۋ سەبەپتەرىنە جانە ەڭ تومەنگى كۇنكورىس دەڭگەيىنە بايلانىستى بولادى.

2023 جىلعى 1 قاڭتاردان باستاپ مۇگەدەكتىگى بويىنشا جانە اسىراۋشىسىنان ايىرىلۋ جاعدايى بويىنشا مەملەكەتتىك الەۋمەتتىك جاردەماقىلاردىڭ مولشەرى ەڭ تومەنگى كۇنكورىس دەڭگەيىنىڭ ۇلعايۋىنا بايلانىستى 8,5%-عا وسكەنىن ەستەرىڭىزگە سالا كەتەيىك.

ماسەلەن، 2023 جىلعى 1 قاڭتاردان باستاپ جالپى اۋرۋدان مۇگەدەكتىگى بويىنشا مەملەكەتتىك الەۋمەتتىك جاردەماقى مولشەرى 1-توپ ءۇشىن – 77 889 تەڭگەنى، 2-توپ ءۇشىن – 62 068 تەڭگەنى، 3-توپ ءۇشىن – 42 190 تەڭگەنى قۇرايدى.

پىكىرلەر