رەسەي ۇكىمەتى "وتىرىك اقپارات" جانە بيلىك ورگاندارى مەن مەملەكەتكە قۇرمەت كورسەتپەۋ تۋرالى ءتورت زاڭ جوباسىنا وڭ پىكىر ءبىلدىردى. "ينتەرفاكس" اگەنتتىگىنىڭ رەسەي مەلمەكتەتىك دۋماسى مەملەكەت قۇرىلىمى جانە زاڭناما كوميتەتىنىڭ توراعاسى پاۆەل كراشەنيننيكوۆكە سىلتەمە جاساپ حابارلاۋىنشا، ەكى زاڭ جوباسىنا قاتىستى پىكىر 24 قاڭتارعا قاراعان ءتۇنى عانا تۇسكەن.
زاڭ جوبالارىن بىلتىر جەلتوقساندا فەدەراتسيا كەڭەسى كونستيتۋتسيالىق زاڭناما كوميتەتىنىڭ جەتەكشىسى اندرەي كليشاس پەن ونىڭ بىرنەشە ارىپتەستەرى ۇسىنعان. دەپۋتاتتار "انىق اقپار سياقتى كورىنەتىن راستالماعان قوعامدىق ماڭىزى بار اقپاراتتى" ەگەر ونىڭ سالدارى اۋىر بولسا باق پەن ينتەرنەتتە جاريالاۋعا تىيىم سالۋدى ۇسىنادى. بۇدان وزگە، قۇجاتتاردا قوعامعا، مەملەكەتكە، مەملەكەتتىك سيمۆولدار مەن بيلىك ورگاندارىنا "ابەستىك تانىتىپ، قۇرمەت كورسەتپەۋ" سيپاتىنداعى ماتەريالدارعا دا تىيىم سالۋدى ۇسىنادى. جوبا اۆتورلارى تىيىمدى بۇزعاندارعا ايىپپۇل سالۋدى نەمەسە اكىمشىلىك قاماۋعا الۋدى ۇسىنادى. سونىمەن قاتار، ينتەرنەتتەگى مۇنداي اقپاراتتار بۇعاتتالىپ وتىرماق.
بۇعان دەيىن رەسەي باس پروكۋراتۋراسى، كوممۋنيكاتسيا جانە اقپارات مينيسترلىگى مەن روسكومنادزور مەكەمەسىنىڭ وكىلدەرى زاڭ جوبالارىن سىناعان. الايدا، كەيىن باس پروكۋراتۋرا پىكىرىن وزگەرتكەن.
24 قاڭتاردا زاڭ جوبالارى العاشقى وقىلىمدا قارالادى. كەشە مەملەكەتتىك دۋما كەڭەسى ەگەر ۇكىمەت بۇگىن تاڭەرتەڭگە دەيىن زاڭ جوبالارىنا قاتىستى رەسمي پىكىرىن جولداماسا، وندا قۇجاتاتردى ءبىرىنشى وقىلىمدا قاراۋدى كەيىنگە قالدىراتىنىن ەسكەرتكەن.
"ازاتتىق" راديوسى
