قر مەملەكەتتىك كەڭەسشىسى ەرلان قارين استانا جانە الماتى قالالارىندا زيالى قاۋىم وكىلدەرىمەن كەزدەسىپ، 2022 جىلعى مادەنيەت سالاسىنداعى مەملەكەتتىك ستيپەنديانى سالتاناتتى تابىستاۋ راسىمىنە قاتىستى. بۇل تۋرالى ورتالىق كوممۋنيكاتسيالار قىزمەتى جازدى، دەپ حابارلايدى «ادىرنا» ءتىلشىسى.
مەملەكەتتىك ستيپەنديا مادەنيەت پەن ونەر قايراتكەرلەرىنە، شىعارماشىل تۇلعالارعا جانە جاستارعا ەلىمىزدىڭ رۋحانياتىن قالىپتاستىرۋعا، دامىتۋعا قوسقان ۇلەسى ءۇشىن بەرىلەدى.
بيىل 75 ادام مەملەكەتتىك ستيپەنديا يەگەرى اتاندى. ولاردىڭ قاتارىندا ولجاس سۇلەيمەنوۆ، مىرزاتاي جولداسبەكوۆ، دۋلات يسابەكوۆ، تولەن ابدىكۇلى، سماعۇل ەلۋباي، كۇلاش احمەتوۆا، ءحانبيبى ەسەنقاراقىزى، اقۇشتاپ باقتىگەرەەۆا سەكىلدى كورنەكتى اقىن-جازۋشىلار، ءاسانالى ءاشىموۆ، ءسابيت ورازباەۆ، تۇڭعىشباي جامانقۇلوۆ سياقتى ونەر قايراتكەرلەرى بار.
سونىمەن قاتار، ەرلان ءجۇنىس، سامال ەسلياموۆا، فارحات مولداعالي جانە تاعى دا باسقا جاس دارىندارعا قولداۋ كورسەتىلدى.
ەرلان قارين سوڭعى جىلدارى ەلىمىزدە جۇزەگە اسىرىلىپ جاتقان رەفورمالار جايىندا جان-جاقتى ايتتى. اسىرەسە، قوعامدىق-ساياسي، الەۋمەتتىك جاڭعىرۋ جۇمىستارىن اتاپ ءوتتى. بۇدان بولەك، مەملەكەت تاراپىنان ادەبيەت پەن ونەردى قولداۋعا قاتىستى اتقارىلعان باستامالار جايىندا مالىمەت بەردى.
مەملەكەتتىك كەڭەسشى 2023 جىلى رۋحانيات، ادەبيەت پەن ونەر باعىتىندا ماڭىزدى داتالاردىڭ كوپ ەكەنىن ايتا كەلىپ، زيالى قاۋىم وكىلدەرىن بيىل قولعا الىناتىن جۇمىستاردىڭ جاي-جاپسارىمەن تانىستىردى.
