QR Memlekettik keńesshisi Erlan Qarın Astana jáne Almaty qalalarynda zııaly qaýym ókilderimen kezdesip, 2022 jylǵy mádenıet salasyndaǵy memlekettik stıpendııany saltanatty tabystaý rásimine qatysty. Bul týraly Ortalyq kommýnıkaııalar qyzmeti jazdy, dep habarlaıdy «Adyrna» tilshisi.
Memlekettik stıpendııa mádenıet pen óner qaıratkerlerine, shyǵarmashyl tulǵalarǵa jáne jastarǵa elimizdiń rýhanııatyn qalyptastyrýǵa, damytýǵa qosqan úlesi úshin beriledi.
Bıyl 75 adam Memlekettik stıpendııa ıegeri atandy. Olardyń qatarynda Oljas Súleımenov, Myrzataı Joldasbekov, Dýlat Isabekov, Tólen Ábdikuly, Smaǵul Elýbaı, Kúlásh Ahmetova, Hanbıbi Esenqaraqyzy, Aqushtap Baqtygereeva sekildi kórnekti aqyn-jazýshylar, Asanáli Áshimov, Sábıt Orazbaev, Tuńǵyshbaı Jamanqulov sııaqty óner qaıratkerleri bar.
Sonymen qatar, Erlan Júnis, Samal Eslıamova, Farhat Moldaǵalı jáne taǵy da basqa jas daryndarǵa qoldaý kórsetildi.
Erlan Qarın sońǵy jyldary elimizde júzege asyrylyp jatqan reformalar jaıynda jan-jaqty aıtty. Ásirese, qoǵamdyq-saıası, áleýmettik jańǵyrý jumystaryn atap ótti. Budan bólek, memleket tarapynan ádebıet pen ónerdi qoldaýǵa qatysty atqarylǵan bastamalar jaıynda málimet berdi.
Memlekettik keńesshi 2023 jyly rýhanııat, ádebıet pen óner baǵytynda mańyzdy datalardyń kóp ekenin aıta kelip, zııaly qaýym ókilderin bıyl qolǵa alynatyn jumystardyń jaı-japsarymen tanystyrdy.
