2023 جىلعى 1 قاڭتاردان باستاپ مەملەكەتتىك الەۋمەتتىك ساقتاندىرۋ قورىنان جۇمىسىنان ايىرىلعان، ەڭبەككە قابىلەتتىلىگىنەن ايىرىلۋ جانە اسىراۋشىسىنان ايىرىلۋ جاعدايلارى بويىنشا الەۋمەتتىك تولەمدەر مولشەرى ۇلعايتىلدى، سونداي-اق بالا كۇتىمى بويىنشا تولەمدەر كەزەڭى ۇزارتىلدى. بۇل تۋرالى قر ەڭبەك جانە حالىقتى الەۋمەتتىك قورعاۋ مينيسترلىگىنىڭ ءباسپاسوز قىزمەتى ايتتى، دەپ حابارلايدى «ادىرنا» ءتىلشىسى.
مەملەكەت باسشىسىنىڭ جولداۋىن ىسكە اسىرۋ شەڭبەرىندە جۇمىسىنان ايىرىلعان جاعدايدا تولەنەتىن الەۋمەتتىك تولەمدى ەسەپتەۋ ءۇشىن قولدانىلاتىن تابىستى الماستىرۋ كوەففيتسيەنتى 40% - دان 45% - عا دەيىن ۇلعايتىلدى. 2023 جىلى 117 مىڭعا جۋىق ازاماتقا جۇمىسىنان ايىرىلعان جاعدايدا تولەنەتىن الەۋمەتتىك تولەم ورتا ەسەپپەن 13% - عا ءوسىپ، ارتتىرىلعان مولشەردە تاعايىندالادى دەپ كۇتىلۋدە.
سونداي-اق بالا كۇتىمى بويىنشا الەۋمەتتىك تولەمدى جۇزەگە اسىرۋ ۇزاقتىعى 1 جاستان 1,5 جاسقا دەيىن ۇزارتىلدى. بيىل بۇل تولەم 500 مىڭنان استام اتا-اناعا تاعايىندالۋى جوسپارلانۋدا.
بۇدان بولەك، ەڭبەككە قابىلەتتىلىگىنەن ايىرىلعان 78 مىڭ ادامعا جانە اسىراۋشىسىنان ايىرىلعان 55 مىڭ وتباسىعا بازالىق مەملەكەتتىك جاردەماقىلارعا قوسىمشا تاعايىندالاتىن الەۋمەتتىك تولەمدەردىڭ مولشەرى 8,5% - عا ارتتى.
وسىلايشا، جۇمىس ىستەيتىن ازاماتتاردى الەۋمەتتىك قامسىزداندىرۋ جۇمىس ىستەمەيتىندەرگە قاراعاندا جوعارى بولماق.
