وردا بۇزار وتىزىنا تاياعان ازامات ەمشىنىڭ قولىنان قازا تاپتى. ونىڭ ولىمىنە كۇدىكتى رەتىندە حالىق ەمشىسى قاماۋعا الىندى. وقىس وقيعا 12 قاڭتاردا قاراساي اۋدانىندا بولعان. 28 جاستاعى ەر ادام ءوز ۇيىندە ءولى تابىلعان. سوت-مەديتسينالىق تەكسەرۋىنىڭ ناتيجەسىندە كەۋدە قۋىسىنىڭ تۇيىق جاراقاتى، قابىرعالارىنىڭ سىنۋى مەن وكپەنىڭ جاراقاتتانۋى سالدارىنان جاس جىگىت قايتىس بولعان. قايتىس بولعان ازاماتقا ءتۇرلى اۋىر دەنە جاراقاتىن سالۋ سەبەبىمەن ونىڭ ولىمىنە اكەلۋگە قاتىسى بار دەگەن كۇدىكپەن پوليتسەيلەر حالىق ەمشىسىنىڭ ۇستىنەن قىلمىستىق ءىس قوزعادى.
"پوليتسياعا قايتىس بولعان ازاماتتىڭ تۋىستارىنان ءالى كۇنگە ارىز تۇسكەن جوق. الايدا بۇل دەرەك بويىنشا رق قىلمىستىق كودەكسىنىڭ 106-بابى 3-تارماعىنا سايكەس سوتقا دەيىنگى تەرگەۋ امالدارى جۇرگىزىلىپ جاتىر. قىلمىستىق ىستە كۇدىكتى رەتىندە ءداستۇرلى ەمەس مەديتسينا قىزمەتىمەن اينالىساتىن 63 جاستاعى ەر ادام ايىپتالىپ جاتىر", - دەپ اتاپ ءوتتى الماتى وبلىسى پوليتسيا دەپارتامەنتىنىڭ ءباسپاسوز قىزمەتى. انىقتالعانىنداي، حالىق ەمشىسىنە قايتىس بولعان ازاماتتى ونىڭ تۋىستارى الىپ كەلگەن. تۋىستارى، جاس ازاماتقا جىن كىرگەن جانە سونىڭ سالدارىنان سوڭعى ءۇش جىل قينالىپ جۇرگەن دەپ ويلاعان. حالىق ەمشىسىنىڭ 5 كۇن بويى ءتۇرلى ادىستەردى قولدانۋ ارقىلى ازاماتتان جىندى شىعارۋ سالدارىنان جابىرلەنۋشىنىڭ كوز جۇمۋى مۇمكىن دەلىنەدى.
"بۇل ءىس قاراساي اۋدانى پوليتسياسىنىڭ وندىرىسىندە. كۇدىكتى ۋاقىتشا ۇستاۋ مەكەمەسىنە قاماۋعا الىندى", - دەپ وبلىستىق پوليتسيا ءباسپاسوز قىزمەتى مالىمدەدى.
"ادىرنا" ۇلتتىق پورتالى
