Halyk Bank قازاقستان رەسپۋبليكاسىنىڭ تسيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى مەن «ۇلتتىق اقپاراتتىق تەحنولوگيالار» اق قولداۋىمەن جاڭا قىزمەتتى ىسكە قوستى. اتاپ ايتساق، بانك كليەنتتەرى Halyk Homebank قوسىمشاسىندا وزدەرىنىڭ تسيفرلىق قۇجاتتارىنا تۇراقتى قول جەتكىزە الادى.
ماسەلەن، قازاقستاندىق اۋە كومپانيالارىنىڭ ىشكى جولاۋشىلار رەيستەرىمەن ساياحاتتاۋ كەزىندە Halyk Homebank پايدالانۋشىسى قازاقستاننىڭ بارلىق اۋەجايىندا، «قازاقستان تەمىر جولى» اق ۆوكزالدارىندا ۆاگونعا وتىرعىزۋ كەزىندە قۇجاتتارىنىڭ تسيفرلىق نۇسقالارىن قاراپ، كورسەتە الادى.
جاڭا قىزمەتتى پايدالانۋدىڭ ماڭىزدى شارتى — مەملەكەتتىك دەرەكتەر قورىندا تسيفرلاندىرىلعان اقپاراتتىڭ بولۋى. Halyk Homebank قوسىمشاسى كليەنتىنىڭ كەلىسىمىمەن سەرۆيس ارنايى QR كودىن نەمەسە تسيفرلىق قۇجاتتىڭ قىسقا كودىن وقۋ ارقىلى ءۇشىنشى تۇلعالارعا ونىڭ تسيفرلىق قۇجاتتارىنا قول جەتكىزۋدى قامتاماسىز ەتەدى.
قۇجاتتار تىكەلەي egov.kz مەملەكەتتىك قىزمەتتەر پورتالىنان جۇكتەلەدى جانە حالىق بانكىنىڭ كليەنتتەرى جەكە دەرەكتەرىنىڭ قاۋىپسىز قورعالعانىنا سەنىمدى بولا الادى.
Halyk Homebank قوسىمشاسىنداعى تسيفرلى قۇجاتتاردى قاراۋ ءۇشىن باستى بەتتەگى «مەملەكەتتىك قىزمەتتەر» بولىمىندە «مەنىڭ قۇجاتتارىم» تارماعىن تاڭداپ، ودان ارى SMS ارقىلى جەكە دەربەس دەرەكتەردى قولدانۋعا كەلىسىم بەرۋ قاجەت. سۇراعان تاراپقا QR-كودتى نەمەسە تسيفرلى قۇجاتتىڭ قىسقا كودىن كورسەتكەنىڭىز جەتكىلىكتى. قىسقا كود ارقىلى بانك قىزمەتتەرىن، ياعني Halyk Bank بولىمشەلەرىندە پايدالانۋعا بولادى. قازىرگى ۋاقىتتا Halyk Homebank قوسىمشاسىندا تسيفرلى قۇجاتتاردىڭ 18 ءتۇرى بار، ولاردىڭ ىشىندە جەكە كۋالىك، جۇرگىزۋشى كۋالىگى، ۆاكتسيناتسيا پاسپورتى، پتر-تەست، تۋ تۋرالى كۋالىك، الەۋمەتتىك كۋالىك بار.
ەسكە سالا كەتەيىك، تسيفرلىق قۇجات – تۇپنۇسقا قۇجاتتىڭ انالوگى.
