قازاقستان رەسپۋبليكاسى ۇكىمەتىنىڭ كەيبىر شەشىمىنە وزگەرىستەر ەنگىزەلەدى. اتاپ ايتساق، وڭتۇستىك قازاقستان ۋنيۆەرسيتەتىنە وزبەكالى جانىبەكوۆتىڭ اتى بەرىلمەك، دەپ حابارلايدى «ادىرنا» ءتىلشىسى.
ۇكىمەت قاۋلىسىنىڭ جوباسى اشىق نقا پورتالىندا جاريالاندى.
«وڭتۇستىك قازاقستان مەملەكەتتىك پەداگوگيكالىق ۋنيۆەرسيتەتى» كوممەرتسيالىق ەمەس اكتسيونەرلىك قوعامى» دەگەن جول مىناداي رەداكتسيادا جازىلسىن:
«وزبەكالى جانىبەكوۆ اتىنداعى وڭتۇستىك قازاقستان مەملەكەتتىك پەداگوگيكالىق ۋنيۆەرسيتەتى» كوممەرتسيالىق ەمەس اكتسيونەرلىك قوعامى;»—دەلىنگەن حابارلامادا.
وزبەكالى جانىبەكوۆ — مەملەكەت قايراتكەرى، ەتنوگراف، تاريح عىلىمدارىنىڭ كانديداتى. ول 20 عاسىردىڭ 70-جىلدارىندا قوجا احمەت ياساۋي كەسەنەسىنىڭ قالپىنا كەلتىرىلۋىنە ۇيىتقى بولدى. قايراتكەردىڭ باستاماسىمەن قازاقستاننىڭ كوپتەگەن قالاسىندا ەتنوگرافيالىق مۇراجايلار اشىلدى، قازاقستاننىڭ تاريحي جانە مادەني ەسكەرتكىشتەرىن ساقتاۋ مەن قالپىنا كەلتىرۋ ماقساتىن كوزدەگەن “ارقاس” قوعامى قۇرىلدى. انا ءتىلىن دامىتۋ باعدارلاماسىنىڭ مەملەكەتتىك تۇجىرىمداماسىن جاساۋعا قاتىستى.
