بۇگىن العاش رەت «رۋحتاستار» جاستار سىيلىعىنىڭ يەگەرلەرىن ماراپاتتاۋ ءراسىمى ءوتتى. «AMANAT» پارتياسىنىڭ «جاستار رۋحى» جاستار قاناتىنىڭ ۇزدىك ۆولونتەرلەرى مەن بەلسەندىلەرى قوعامدىق قىزمەتى، ەلىمىزدەگى جاستار ساياساتىنىڭ دامۋىنا قوسقان ۇلەسى ءۇشىن مۇسىنشە مەن سەرتيفيكاتقا يە بولدى.
«AMANAT» پارتياسى جاستار قاناتىنىڭ كەزەكتەن تىس VI سەزىندە قازاقستان پرەزيدەنتى قاسىم-جومارت توقاەۆ جاستار ءۇشىن ءۇش ماڭىزدى باسىمدىقتى اتاپ وتكەن بولاتىن. ولار – تەرەڭ ءبىلىم، ەڭبەكقورلىق جانە وتانشىلدىق قاسيەت. سول كەزدە جاستار قاناتىن ترانسفورماتسيالاۋ باعدارلاماسى قابىلداندى.
ءىس-شارانى اشقان «AMANAT» پارتياسىنىڭ اتقارۋشى حاتشىسى اسحات ورالوۆ جاستار دامۋدىڭ نەگىزگى قوزعاۋشى كۇشى سانالاتىنىن اتاپ ءوتتى.
«ادىلەتتى قازاقستان ءبىلىمدى جانە ەڭبەكقور جاستاردىڭ كۇشىمەن قۇرىلادى. ەلدەگى بارلىق باستامالار مەن رەفورمالار جاستارمەن بىرگە ىسكە اسىرىلىپ كەلەدى. جاس قازاقستاندىقتار ءوز قارىم-قابىلەتىن تانىتۋ ءۇشىن بارلىق مۇمكىندىككە يە بولۋى ءتيىس. سوندىقتان، بيىل العاش رەت وتكىزىلىپ وتىرعان «رۋحتاستار» سىيلىعى جاس ازاماتتاردى بەلسەندى قوعامدىق قىزمەتكە ىنتالاندىرۋعا جانە جاستاردى ورتاق، جاسامپاز قۇندىلىقتار توڭىرەگىندە توپتاستىرۋعا باعىتتالعان»، – دەدى اسحات ورالوۆ.
وسىلايشا، «قايسار» جىل باتىرى نوميناتسياسىن بويىنشا جاڭاوزەن قالاسىنىڭ پوليتسيا اعا لەيتەنانتى الىبەك باسباەۆ جەڭىسكە جەتتى. ول ءوز ومىرىنە قاتەر ءتونىپ تۇرعانىنا قاراماستان، ءۇشىنشى قاباتتاعى پاتەردىڭ تەرەزەسىنە كوتەرىلىپ، قۇلاپ كەتۋگە شاق قالعان اۋتيست بالانى قۇتقارىپ قالدى.
«پوليتسيا بولىمىنە حابارلاما كەلىپ ءتۇستى. وندا تەرەزە الدىندا ەرەكشە بالا تۇرعانى جانە ەسىكتى ءوز بەتىنشە اشا المايتىنى ايتىلدى. ءبىز بىردەن وقيعا ورنىنا كەلدىك. مەن ەكىنشى قاباتتاعى كورشى پاتەر ارقىلى ءۇشىنشى قاباتقا كوتەرىلدىم. ءسويتىپ، بالانى امان-ەسەن اناسىنا تابىس ەتتىك. بۇل ءبىزدىڭ كۇندەلىكتى جۇمىسىمىز. ماراپات تۋرالى ويلاعان دا ەمەسپىن»، – دەدى الىبەك باسباەۆ.
«نۇرلى اقىل» جىل ستۋدەنتى نوميناتسياسى بويىنشا جوعارى ۇلگەرىمى مەن بەلسەندى قوعامدىق قىزمەتى ءۇشىن سەمەي قالاسىنىڭ ستۋدەنتى مەدينا بەيىمبەتوۆا ماراپاتقا يە بولدى. ول بۇگىندە جەتىسۋ ۋنيۆەرسيتەتىندەگى «Start up اكادەميانىڭ» رەزيدەنتى. سونداي-اق، روبوتوتەحنيكا مەكتەبىندە جۇمىس ىستەيدى. بۇعان قوسا، وقۋشىلاردى ءتۇرلى وليمپيادالار مەن جارىستارعا دايىندايدى.
وسكەمەن قالاسىنان كەلگەن سىرىم ومىرزاقوۆ «ىستىق قايرات» ەڭبەك ادامى نوميناتسياسىندا جەڭىسكە جەتتى. سىرىم قالالىق جەو-دا جەتەكشى ينجەنەر بولىپ جۇمىس ىستەيدى. سونداي-اق، ول جۇمىس ىستەپ قانا قويماي، جاستار اراسىنداعى قىزمەتىن دە ۇتىمدى ۇيلەستىرىپ ءجۇر.
«جىلدىڭ ەكوبەلسەندىسى» نوميناتسياسىندا قوستاناي وبلىسىنىڭ فەدوروۆكا اۋىلىنىڭ كاسىپكەرى ناۋرىزبەك بىرماعامبەتوۆ جەڭىسكە لايىق دەپ تانىلدى. ونىڭ ەسەبىندە قورشاعان ورتانى قورعاۋ بويىنشا كوپتەگەن جوبالار مەن ءىس-شارالار بار.
ال «جىلدىڭ الەۋمەتتىك جوباسى» نوميناتسياسى بويىنشا جەڭىستى پەتروپاۆل قالاسىنان كەلگەن ستۋدەنت، «بارشاعا ارنالعان عىلىم» جوباسىنىڭ جەتەكشىسى ۆالەريا استاپوۆا جانە «Tahtay Team» جەكپە-جەك كلۋبىنىڭ نەگىزىن قالاۋشى، MMA كاسىبي سپورتشىسى، استانادان كەلگەن ۆاسيلي تاحتاي ءبولىستى.
استانا قالاسىنان كەلگەن ستۋدەنت دياس تۇگەلباەۆ پەن تاراز قالاسىنان كەلگەن اياۋلىم راسىلحان «رۋحتى بەلسەندى» جىل بەلسەندىسى نوميناتسياسى بويىنشا جىلدىڭ ۇزدىك بەلسەندىلەرى اتاندى.
«پاندەميانىڭ اسا اۋىر كەزەڭىندە كۇن سايىن 300-دەن استام وتباسىعا ىستىق تاماق جەتكىزىپ جۇردىك. كوپبالالى جانە از قامتىلعان وتباسىلارعا، زەينەتكەرلەرگە جانە ەرەكشە قاجەتتىلىكتەرى بار ادامدارعا 120 مىڭنان استام مەديتسينالىق ماسكا تاراتتىق. ال ۇيدەن شىعا الماعاندارعا ازىق-تۇلىك پەن ءدارى-دارمەك جەتكىزدىك. مەنىڭ ويىمشا، ءاربىر قازاقستاندىق ازامات بەلسەندى بولىپ، اينالاسىنداعى جاعدايعا بەي-جاي قاراي الماۋى كەرەك. «AMANAT» پارتياسىندا ەڭبەگىمدى ەلەنىپ جاتقانىنا قۋانىشتىمىن»،– دەدى اياۋلىم راسىلحان
«رۋحتاستار» سىيلىعى اياسىندا «جىلى جۇرەك» نوميناتسياسى بويىنشا ورال قالاسىنىڭ تۇرعىنى تالعات شۋدابا جانە قاراعاندىدان كەلگەن ستۋدەنت اقسانات تولەسوۆا ۇزدىك ۆولونتەرلەر اتاندى. بەلگىلى بەلسەندى ازامات، «بەلگىسىز قازاقستان» بلوگىنىڭ اۆتورى، استانالىق دياس كامەريدانوۆ «مەديا سالاسىنىڭ ۇزدىگى» نوميناتسياسى بويىنشا جەڭىمپاز دەپ تانىلدى.
«قايىرىمدىلىق جانە ۆولونتەرلىك ىسىمەن 7 جىلدان بەرى اينالىسىپ كەلەمىن. ءبىز مۇقتاج ادامداردى ازىق-تۇلىكپەن قامتىپ، كومەك كورسەتەمىز. سونداي-اق، شالعاي اۋىلداردا قۇدىق قازامىز. بۇدان وزگە دە الەۋمەتتىك جوبالاردى قولعا الىپ ءجۇرمىز. مەن ءۇشىن ۆولونتەرلىك قىزمەت – جۇرەك قالاۋى»، – دەدى تالعات شۋدابا.
سونىمەن قاتار، م. اۋەزوۆ اتىنداعى وڭتۇستىك قازاقستان ۋنيۆەرسيتەتىنىڭ بولىمشەسى جانە الماتى قالاسى اۋەزوۆ اۋداندىق بولىمشەسى «جاستار رۋحى» جاستار قاناتىنىڭ ۇزدىك بولىمشەسى بولىپ تانىلدى.
«رۋحتاستار» سىيلىعى – بۇل جاي عانا جاقسى دوستارمەن جۇزدەسۋ جانە بەلسەندىلەردىڭ ەڭبەگىن قۇرمەتتەۋ ەمەس. بۇل – شالقار شابىت، الەۋمەتتىك جۇمىسپەن اينالىسۋعا، مۇقتاج جاندارعا كومەكتەسۋگە، ۇيرەنۋگە، يگى جۇمىس ىستەۋگە جانە ارمانداۋعا ىنتالاندىرۋ. وسى شابىت ۇزاق ۋاقىت قاناتتاندىرادى دەپ سەنەمىن موتيۆاتسيا ماعان ۇزاق ۋاقىت جەتەدى»، – دەدى وڭتۇستىك قازاقستان ۋنيۆەرسيتەتى جانىنداعى «جاستار رۋحى» ءبولىمىنىڭ باسشىسى گۇلرۋح كۋدراتۋللاەۆا.
«جاستار رۋحى» جاستار قاناتىنىڭ پاۆلودار جانە اقمولا وبلىستارىنداعى فيليالدارى «ۇزدىك فيليال» نوميناتسياسى بويىنشا جەڭىمپاز اتاندى.
